Nalandig sa Cebu City Medical Center (CCMC) ang drayber sa motorsiklo nga nag-park kilid sa V. Rama Ave., Barangay Calamba, dakbayan sa Sugbo, human mabanggai sa usa ka Ford Everest (YIU 704) sa Martes sa ala 1:45 kaadlawon sa Nobiyembre 14, 2023.
Ang biktima nga nakaangkon og mga pangos ug bun-og giila nga si Jimrod Arriesgado Bica, 30, taga Brgy. Tapilon, Daanbantayan, amihanang Sugbo samtang ang driver sa SUV giilang si John Vincent Bracero, 31, taga Dan C. Padilla, dakbayan sa Sugbo.
Matod sa biktima sa imbestigasyon sa Sawang Calero Police Station nga samtang siya nipahuway kilid sa karsada, kalit lang siya nga gibanggaan sa SUV nga niresulta sa iyang pagka lagpot.
Tungod sa kakusog sa dagan, nidiretso pa ang SUV sa poste hinungdan nga nahayang ang maong sakyanan.
Bisan sa impact,wa maunsa si Bracero.
Si Police Major Francis Renz Talosig, hepe sa Sawang Calero Police Station, nitug-an nga nakahukom ang biktima nga dili na mopasaka og kaso human magkasinabot nga si Bracero maoy mobayad sa tanang gasto sa tambalanan ug uban pa nga gikinahanglan niini.
Sa sulod sa Cebu City Medical Center, nagpinirmahay og kasabutan sila si Bracero ug Bica nga wa nay kaso nga ipasaka.
NAMATAY
Sa laing bahin, namatay sulod sa tambalanan ang Korean National nga nakabangga og dili momenos duha ka mga sakyanan, usa ka motorsiklo ug duha ka nagbisikleta sa Pope John Paul II Ave., Barangay Mabolo, Dakbayan sa Sugbo.
Matod ni Police Lieutenant Colonel Janette Rafter, deputy city director for operations sa Cebu City Police Office, nga pasado alas 6 sa Sabado sa gabii sa Nobiyembre 11, 2023, gideklarar nga patay si Jaehyun Lee.
Tungod sa iyang kamatayon mamahimong dili na molambo ang kasong kriminal nga ipasaka sa Mabolo Police Station batok sa maong langyaw.
Apan mamahimong moduso gihapon sa ilang reklamo ang kabanay sa namatay nga si Jomarie Dacaldacal Bernas nga taga Brgy. Luz, Dakbayan sa Sugbo.
Andam motabang ang kapulisan sa kabanay sa namatay aron maabagan sa pamilya sa langyaw sa gasto sa pagpalubong apan gitambagan nga moduol og abogado alang sa uban pa nga civil liabilities sa nakabangga.