ANAA sa luwas nga kahimtang ang usa ka 35-anyos nga babaye nga nisuway og paligis sa mga sakyanan ug naglumos sa kadagatan sa Baywalk South Road Property, Barangay Mambaling, Dakbayan sa Sugbo sa Miyerkules, Hulyo 30, 2025.
Giila ang babaye sa iyang ginikanan, buwag na sa bana, nagtrabaho sa usa ka beerhouse nga taga Barangay T. Padilla, Siyudad sa Sugbo.
Nakadawat og tawag ang Waterfront Police Station mahitungod sa maong report hinungdan nga ilaha kini'ng gisusi ug gitabangan sa pag-rescue inabagan sa mga tanod sa Barangay Ermita ingon man kawani sa Cebu Port Authority ug gi-turn over sa maong barangay.
Usa sab ka concern citizen ang naka-video dihang gi-rescue ang maong babaye nga una niya nga gihimo ang suway og paligis sa mga sakyanan apan giingong dunay nakapugong hinungdan nibalhin siya sa dagat og didto nisuway og lumos sa kaugalingon apan nilutaw ra sab.
Nasayran nga si alyas Baby hubog niadtong higayona ug tungod sa iyang problema nga nasinati, nahimo niya ang suway nga pagkutlo sa iyang kinabuhi.
Giingong naguol si Baby tungod sa pagsamok-samok sa iyang kanhi bana nga usa ka retired police ug pakauwawan siya sa iyang trabaho.
Apan sa habig sab sa pamilya, giingong dako ang pagtuo nga nagumon kini sa ilegal nga drugas ug pirmeng mag-hallucinate o maratol kay dunay magsunod-sunod nga gustong mopatay niya.
Gidala si Baby sa Vicente Sotto Memorial Medical Center, Center for Behavioral Sciences (Psychiatric and Psychological Services) sanglit gusto sa pamilya nga matambalan siya ug mabalik na sa normal nga kaugalingon.
Sa kadtong nag-antos og depression ang Philippine Mental Health Association, Inc. Cebu Chapter nagtanyag og online psychiatric ug psychological services.
Mamahimong matawagan ang mga mental health professionals sa mobile number nga 0917-655-0023; pmhacebu1950@gmail.com, Lunes ngadto sa Biyernes, 8AM-5PM.
Mamahimo sab nga tawagan ang Tawag Paglaum Centro Bisaya, 24/7 call-based hotline alang sa suicide prevention ug emotional crisis sa numero 0939-937-5433; 0939-936-5433 ug 0927-654-1629. / JDG