LINGAWON pagbalik sa real-life couple nga Sweetnotes Music ang mga Sugboanon alang sa usa ka concert sa SM Seaside City Cebu sa South Road Properties, Cebu City karong adlawng Sabado, Hulyo 5, 2025.
Sila si Charlotte Mae ug Jeffrey Bactong Jr., mo-perform
sa ilang mga sikat nga cover songs atubangan sa mga Sugboanon sa Sky Hall sa maong mall.
Matod ni Jeffrey dihang nahinabi sa mga tigbalita kagahapon nga lingaw gyud kanunay kon ang ilahang crowd mga Bisaya sab.
Mao na nga gilauman na nila nga dali ra nga maka-jive ang mga concertgoer sa ilahang show karong hapon.
Samtang gibutyag sa duha nga karong tuiga nila plano nga mo-release sa ilahang kaugalingon nga mga kanta.
Tungod sa ilahang daghang invitations hinungdan nga wala pa nila kini ma-finalize apan pasalig sa duha nga sa dili pa matapos ang tuig, maka-release sila og original songs alang sa ilang fans.
Hinuon karon, naghinayhinay ang duo nga gikan sa General Santos City sa Mindanao sa pagdawat og gigs aron sab ampingan ang ilang panglawas.
Ang The Big Secret concert sa Sweetnotes Music, dalit sa The Big Secret Philippines sa ubos nga presyo nga P500.
Samtang anaay laing VIP ticket prices nga mamahimong ma-avail sa publiko ug makakuha og kahigayunan nga makadaog og P1 million. / HBL