Nakaipsot ang coordinator sa illegal numbers swertres game apan iyang duha ka “ushers” napusasan sa kapulisan sa Anti-illegal gambling operation sa Probinsya sa Sugbo.
Unang girumbo sa kapulisan alas 4:10 sa hapon, Martes July 29, 2025, sa Purok Neemtree, Sitio Sulima, Brgy. Cotcot, Lungsod sa Liloan diin napusasan si Jay Mark Calunod Bantilan, 29, ulitawo, nagpuyo sa nahisgutang lugar.
Na-recover sa posisyon ni Bantilan ang nagkadaiyang number combinations, ballpen, halin sa illegal swertres nga P200 ka pesos.
Paglabay sa 30 minutos girumbo sa kapulisan ang nagpadagan sa “illegal number swertres games” alas 4:45 sa hapon sa Purok Carrot 3, Sitio Dapdap, Brgy. Catarman, Lungsod sa Liloan.
Naaktuhan sa kapulisan ug napusasan si Gilfor Generilao Olimba, 40, biyudo, nagpuyo sa nahisgutang lugar.
Apan nakaipsot si Peter Grillen Dagatan Tajor, hingkod ang panuigon, nagpuyo sa nahisgutang lugar ug coordinator sa illegal swertres.
Nakuha sa kapulisan sa posisyon ni Olimba ang gambling paraphernalia. / GPL