Subay sa pagbukas sa kasaulogan sa ika-456 nga pagkalalawigan sa Sugbo, gibuksan sab ang Tabo sa Kapitolyo nga gilangkuban sa moabot 80 ka mga exhibitors gikan sa 51 ka mga lokal nga kagamhanan lakip ang Dakbayan sa Sugbo ug 31 ka mga pribadong exhibitors sa Lunes, Agusto 4, 2025.
Si Cebu Governor Pamela Baricuatro nipadayag sa iyang kalipay sa panaghiusa sa mga lokalidad diin iyang giawhag ang publiko nga mopalit sa mga produkto.
Subay niini, ang mga LGU’s ug pribadong exhibitors gihatagan og kahigayunan nga maka-display sa ilang mga delicacies ug uban pang mga produkto hangtod sa weekend.
Ang mga pribadong exhibitors nag-abang sa ilang kasamtangang nahimutangan og tag P2,500 alang sa dili mga pagkaon nga baligya samtang P3,000 alang sa mga pagkaon.
Sa tanan nga mga lokalidad, bugtong ang Dumanjug lamang ang wala makaapil ning tuiga diin gikahinaman sa mga tawo ang bisayang manok o ‘bisnok’.
Ang selebrasyon langkuban sab sa nagkadaiyang programa nga naglakip sa caravan of services, mga pahalipay sa empleyado ug uban pa. / ANV
