Taduran mileksyon ni Amparo

ITLE ELIMI­NATOR: Giataki ni Pedro Taduran sa Elorde (wa) si Jake “El Bambino” Amparo sa PMI Bohol boxing stable (tuo) ning aktuha sa ilang IBF world minimumweight title eliminator bout niadtong Huwebes sa gabii, Disyembre 28, 2023, sa Tagbilaran City, Bohol. / EDRI AZNAR
ITLE ELIMI­NATOR: Giataki ni Pedro Taduran sa Elorde (wa) si Jake “El Bambino” Amparo sa PMI Bohol boxing stable (tuo) ning aktuha sa ilang IBF world minimumweight title eliminator bout niadtong Huwebes sa gabii, Disyembre 28, 2023, sa Tagbilaran City, Bohol. / EDRI AZNAR

TAGBILARAN CITY, BOHOL – Agresibong away gikan sa sinugdanan hangtod sa katapusan ang gigamit ni kanhi world champion Pedro “Kid Heneral” Taduran aron pagposte og dominanteng unanimous decision nga kadaugan batok kang Jake “El Bambino” Amparo sa main event sa “Kumong Bol-anon XIII” nga gipasiugdahan sa PMI Bohol Boxing Promotions niadtong Huwebes, Disyembre 28, 2023, sa Bohol Wisdom School Gymnasium.

Ang maong away usa ka International Boxing Federation (IBF) minimumweight title eliminator.

Si judge Jonathan Davis nitali og 119-109, si judge Nobuto Ikehara nirehistro og 118-110 samtang si judge Sanong Uomim nipatik og 116-112 sa ilang scorecards.

Sa kadaugan, nahimo’ng man­datory contender si Taduran sa kasamtangang kampyon sa IBF minimumweight division nga si Ginjiro Shigeoka.

Sa iyang kanunay nga pag-a­taki, hinayhinay nga gibun-og ni Taduran si Amparo pinaagi sa iyang solidong uppercuts nga maoy nagsilbe niyang la­bing lig-ong hinagiban aron kon­tro­lahon ang kinatibuk-ang away.

Si Taduran, kinsa sakop sa Elorde stable sa Manila, nisaka sa 16-4-1, 12KOs nga rekord, samtang si Amparo, kinsa lumad nga taga Guindulman, Bohol, ug sakop sa PMI boxing stable, nahagbong sa 14-5-1, 3KOs nga rekord.

Taliwala sa kapildihan ni Am­paro, si PMI Bohol Boxing Promotions head Atty. Floriezyl Echavez Podot nakadayeg gihapon sa gipakita’ng kaisog ug kalig-on sa iyang batos.

Giangkon ni Podot nga daghan pa nga angay makat-unan ni Amparo apan masaligon siya nga sa ugma damlag, mahimo ra kini nga world champion.

Sa duha ka co-main featured bouts, naangkon ni Gerwin Asilo (8-0, 3 KOs) ang WBO Asia-Pacific bantamweight belt pinaagi sa unanimous decision nga kadaugan batok ni Aljum Pelecio (11-3, 7 KOs) samtang nidaug sab si Joseph Sumabong (6-0, 3 KOs) pinaagi sa unanimous decision batok ni Erson Trinidad (6-4-1, 3 KOs) aron ibulsa ang World Boxing Foundation (WBF) Australasian minimumweight belt.

Sa undercard, ningdaug sila si Brix Piala batok Jhunriel Ramonal (TKO 2), Angilou Dalogdog batok Roland Jay Biendima (TKO 4), Rodex Piala batok Marjhun Tabamo (UD), Jhunrille Castino batok Ryan Ray Ponteras (UD), April Jay Abne batok Ariston Aton (UD), Richard Laspoña batok Raffy Chavit (KO 1) ug Sugarey Leonard Pores batok Adrian Dulayba (UD).

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph