Taduran nagtinguha’g knockout sa ilang rematch ni Shigeoka

Nagtinguha og knockout nga daog si International Boxing Federation (IBF) mini-flyweight champion Filipino Pedro Taduran sa umaabot niyang away diin depensaan niya ang iyang titulo sa usa ka rematch batok ni Japanese Ginjiro Shigeoka karong Mayo 24, 2025, sa Osaka, Japan.

“Excited po ako sa darating kong laban. Gusto kong madipensahan yung title,” matod ni Taduran nga napatik sa www.abs-cbnnews.com.

Nagkanayon si Taduran nga gilauman sa iyang kampo nga buhaton ni Shigeoka ang tanan aron makabawos sa ilang panag-engkuwentro og balik.

Sa premiro nilang away niadtong Hulyo 28, 2024, gi-TKO ni Taduran sa 9th round si Shigeoka aron ilugon ang IBF title.

Gipasabot ni Taduran nga kauban ang iyang coach nga si Carl Peñalosa Jr., ilahang gitun-an og maayo kon unsa nga estilo posibleng gamiton ni Shigeoka sa ilang rematch.

“Kasi alam naming may ibang istilo siya kaya may gagawin kaming strategy sa laban,” pasabot ni Taduran.

Si Peñalosa niingon nga aron maseguro nga modaog si Taduran, kinahanglang di mahuman 12 ka rounds nga away.

“Hindi natin masasabi kung anong round, pero knockout ang kailangan natin para sure na manalo,” batbat ni Penalosa.

“Tatakbo siya [Shigeoka], so kailangan ma-knockout siya para sure ang panalo. Takot ako sa hometown decision, kaya ganyan.”/ ESL