Tag-iya sa Gaisano Main andam mosunod sa easement

SunStar Local News
SunStar Local News

Way supak sa pagpatuman sa three-meter easement sa Dakbayan sa Sugbo ang tag-iya sa usa sa mga daan nga establisemento dinhi sa siyudad.

Andam sila nga moguba sa usa ka bahin sa ilang edipisyo daplin sa Estero de Parian.

Mao ni ang giklaro ni Alex Gaisano, tag-iya sa Gaisano Main, atol sa iyang pakigtagbo sa kadagkuan sa Task Force Gubat sa Baha sa Dakbayan niadtong Biyernes, Mayo 31, 2024.

Siya nipasabot nga tumong sab niya nga makauban sa paglambo sa dakbayan sa Sugbo sama sa panglangtaw sa ubang mga negusyante sa siyudad.

Matod sa taho sa Public Information Office (PIO), ang gipahigayon nga coordinating conference gitambungan ni Estero de Parian River Commander Aderson Comar ug Task Force Operations Officer Charles Villagonzalo.

Ilawom sa Water Code of the Philippines, kinahanglang hawan ang sulod sa tres metros gikan sa masigkatampi sa sapa sa urban nga dapit sama sa dakbayan sa Sugbo.

Nihangyo hinuon si Gaisano nga hinayhinay ang ilang paghawan sa easement habig sa Dan Jakosalem kay dako ang ilang magasto.

Matod sa samang taho, ang maapektuhan mao ang meat section sa Gaisano Main, ang gibutangan sa ilang generator sets, sewerage treatment plant, ingon man ilang cistern tank.

Karong sunod semana, mag-ocular inspection ang habig sa Task Force ingon man ang mga engineer ug mga architect sa Gaisano Main aron pagkab-ot og win-win solution sa sitwasyon. / REV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph