Nahukman na sab nga sad-an sa kasong estafa ang tag-iya sa Sarsalejo Security Agency human misang-at og reklamo ang ikatulong kawani sa maong kompanya.
Si Judge Francis Ian Birondo sa Municipal Trial Court in Cities, Branch 2, Mandaue City, mipagawas sa maong desisyon niadtong Hunyo 25, 2025.
Base sa desisyon ni Judge Birondo, dakong sad-an si Arne Aballe Sarsalejo, usa sa mga tag-iya sa Sarsalejo Security Agency, Inc., sa kasong estafa ubos sa Article 315, paragraph 1(b) sa Revised Penal Code.
Ang kaso, nga may numero nga Criminal Case No. 5215, naggumikan sa kapakyas sa pag-remit sa Social Security System (SSS) contributions nga gilaslas gikan sa suweldo sa usa ka empleyado.
Gisentensiyahan si Sarsalejo og tulo ka bulan ug onse ka adlaw nga pagkabilanggo.
Kini nga silot gibase sa kantidad sa danyos nga gipahayag sa impormasyon sa kaso, nga P2,250.
Bisan pa man nga ang kinatibuk-ang kantidad nga gihashas gikan sa suweldo sa nagreklamo moabot og P13,242.25, mas gigamit sa korte ang mas ubos nga kantidad nga gipahayag sa impormasyon.
Nasayran nga ang nagreklamo, si Junebeb T. Clatero, usa ka kanhi security guard sa Sarsalejo Security Agency, Inc., miingon nga ang SSS monthly contributions gihashas sa iyang suweldo gikan Pebrero 2018 hangtod Marso 2022 apan wala gyud gi-remit bisan pa sa ulahi nga mga bayad sa ahensya.
Nakita sa korte nga ang pagkalangan mismo nakahatag og temporaryong kadaot kang Junebeb, diin nakaplagan ang elemento sa estafa.
Gipadayag ni Junebeb nga dili lang kini iyang kadaugan, apan nalipay usab ang ubang mga gwardiya nga gipahimuslan sa Sarsalejo Security Agency, Inc., sanglit daghan pa ang nag-antos sa maong ahensya.
Samtang, gipakawalay sala sa korte si Jonnifer Pedrano Sarsalejo, bana ni Arne, tungod sa kapakyasan sa prosecution sa pagprobar nga guilty beyond reasonable doubt.
Ang pamilyang Sarsalejo, pinaagi sa ilang abogado nga si Vincent Roel Tabuñag, mipahayag nga ila gyud nga iapelar ang desisyon sa RTC ug masaligon sila nga kini isalikway, sama sa 20 ka susamang kaso nga ilang giatubang sa korte sa Mandaue City nga gipasaka sa ilang kanhi mga security guard. / GPL