Moabot sa 1,333 gikan sa 2,007 nga aplikante sa solo parent financial assistance program sa Dakbayan sa Mandaue City ang makadawat og tinuig nga cash subsidy tag P12,000 nga madawat makaduha ka higayon sa tag P6,000 matag usa.
Ang unang pagpanghatag himuon sa Marso 26, 2025, matod sa chairman sa Committee on Social Services, Konsehal Jimmy Lumapas .
Ang konseho niaprobar sa ordinansa sa miaging tuig apan ang pagpatuman himuon karong tuiga aron madawat sa mga solo parent ang financial aid.
Apan gitataw ni Lumapas nga kinahanglan ipasar ang laing ordinansa aron ang benepisyo madawat kaduha matag tuig.
Ang mga aplikanbte kinahanglan nga lumolupyo sa Dakbayan sa Mandaue nga dunay income ubos sa gitakda nga Philippine Statistics Authority’s poverty threshold, ug wala magdawat og bisan unsang ayuda sa gobiyerno gawas lang sa mga senior citizen ug persons with disabilities.
Kinahanglan silang dunay bisan usa lang ka anak ug nagdawat og ubos minimum wage.
Kadtong solo parents nga mokita og P180,000 o ubos sa P250,000 matag tuig, maoy makadawat sa tinuig nga financial assistance nga dunay duha ka anak samtang kadtong mokita og P250,000 ug ubos sa P300,000 makadawat sab alang sa tulo nila ka anak.
Samtang mga solo parent nga mokita og P300,000 o mosubra pa, kinahanglang dunay upat ka anak aron mo-qualify.
Ang pagpanghatag sayuhon sa di pa ang election ban unya sa Marso 28 aron pagsiguro nga madawat ang financial assistance nga walay kalangay.
Ang mga bata nga mapaubos ning programa magpanuigon og 22 anyos paubos ug kinahanglang anaa sa custody sa solo parent, mababaye man o malalaki. / CAV