Gipasalig sa National Government nga ang pagbaligya sa bugas sa P20 matag kilo magpadayon hangtod sa 2028.
Si Agriculture Secretary Francisco “Kiko” Tiu Laurel Jr., kinsa nangulo sa paglusad sa pagbaligya sa bugas sa P20 matag kilo sa Burgos Public Market sa Bacolod City niadtong Huwebes sa buntag, Hunyo 5, 2025, nagkanayon nga kini ang kamanduan ni Presidente Ferdinand “Bongbong” Marcos Jr.
“It’s also part of President Marcos directive to make sure a good quality of rice that retailed at P20,” matod ni Laurel.
Ubos sa programa, ang matag pamilya tugotan nga makapalit og 10 ka kilo matag semana ug i-prayoridad una kini sa mga kabus nga pamilya tungod kay eksperimento pa kini.
Giprayoridad sa Kagamhanan sa Siyudad sa Bacolod ang mga senior citizen, solo parent, persons with disabilities (PWDs), ug mga miyembro sa Pantawid Pamilyang Pilipino Program (4Ps) nga makapahimulos sa barato nga bugas.
Sa sayo pa, gipahibalo sa DA nga ang pilot launch sa P20 matag kilo nga bugas sa Visayas isip usa sa mga saad sa kampanya ni Marcos sa panahon sa 2022 presidential race.
Ang Food Terminal Inc. (FTI), isip tigpatuman sa DA sa pagbaligya sa bugas ngadto sa LGUs, mopalit og bugas gikan sa National Food Authority (NFA) sa presyo nga P33 matag kilo ug ibaligya kini sa local government units (LGUs) sa subsidized rate nga P26.50 matag kilo.
Ang sobra sa P20 i-subsidize sa LGU ug sa Nasyonal nga Kagamhanan, nga P6.50 matag usa.
Gipasabot ni Laurel nga ang shared subsidy sa nasyonal nga kagamhanan ngadto sa siyudad molungtad hangtod Disyembre 2025, apan ang programa sa Nasyonal nga Kagamhanan, nga P20 matag kilo nga bugas alang sa 15 ka milyon nga panimalay, magpadayon sa Enero 1, 2026 hangtod Hunyo 2028.
“From 2026 onwards is a national government program and each family will be allowed 10 kilos per month,” asoy ni Laurel.
Iyang giingon nga anaa ra sa LGU ang pag-apod-apod sa barato nga bugas ngadto sa ilang mga konstituwente.
Giubanan si Laurel ni Mayor Alfredo Abelardo Benitez, kinsa niseguro nga ang tanang mga residente sa Bacolod makapahimulos sa P20 matag kilo nga bugas.
“We just prioritized the sectoral groups, but eventually we will procure more rice to be retailed at P20 per kilo for all the Bacolodnons,” pasabot ni Benitez.
Matod ni Benitez nga naghulat usab sila sa imbentaryo sa NFA aron mahibal-an ang kinatibuk-ang gidaghanon sa mga sako sa bugas nga itagana alang sa Bacolod.
Human sa paglusad sa Bacolod City, ang DA magpahigayon usab sa paglusad sa P20 matag kilo nga bugas sa Siquijor.
Gipangulohan usab ni Laurel ug sa mga opisyal sa siyudad ang pagtilaw sa P20 matag kilo nga bugas sa NFA sa Burgos Public Market, nga nagpaseguro sa maayong kalidad sa bugas.
Ang pagbaligya sa bugas gipangulohan sa City Cooperative and Livelihood Development Office (CCLDO).
Dugang pa, si Brenda Burdeos, pangulo sa CCLDO, nagkanayon nga sa kasamtangan, ang P20 matag kilo nga bugas anaa sa Burgos Public Market, Central Public Market ug Libertad Public Market.
Iyang giingon nga ang siyudad nagtagana og kinatibuk-an nga 200 ka mga sako sa bugas sa Burgos Public Market, 50 ka sako sa Central Public Market, ug laing 50 ka sako sa Libertad Public Market. / MAP, SunStar Philippines