Ipadayon ni Cebu Governor Pamela Baricuatro sa probinsiya ang P20 kada kilo nga presyo sa bugas nga programa ubos sa administrasyon ni Presidente Ferdinand Marcos Jr.
Kini maoy gikumpirmar sa gobernador atol sa pakighinabi sa mga tigbalita sa Miyerkules, Hulyo 30, 2025.
Apan sa dili pa kini ipadayon, ipaubos una kini sa dugang pagsusi aron masuta kon kinsang mga lokalidad ang mo-uyon sa pag-angkat og baratong bugas.
“I said Yes, Mr. President I will look into that and I will make sure it is implemented,” matod ni Baricuatro sa Miyerkules.
Si Aldwin Empaces, ang Assistant Administrator sa Kapitolyo, nipasabot nga nagpadayon ang gihimong review sa terms and conditions sa lagda sa maong programa ilabi na ang agreement niini tali sa lokal nga kagamhanan.
“But before we roll it out we have to review para klaro unsa gyud ang arrangement with the province and the LGU in terms of co-share kay ang ending basin ang province nay mo-fully subsidized na unya hinuon sa tanan,” sumala ni Empaces.
Subay niini, gikatakda nga magtagbo ang tanang mga mayor sa Agusto aron hisgutan ang mga concerns niini ug mahingpit ang ilang desisyon una mopaubos sa Memorandum of Agreement (MOA) sa matag lokalidad.
“Kay to those who are not interested in the next six months kinahanglan na man siya nga i-dispose kay naa na man say stocks so hopefully we get the commitment para makakuha ta og MOA per LGU,” dugang ni Empaces.
Kahinumdoman nga ang Lalawigan sa Sugbo maoy usa sa gihimong pilot area diin gibaligya ang baratong bugas sa milabay'ng administrasyon sa pipila ka mga lokalidad.
Sa nasayran, ang National Food Authority (NFA) mao ang mobaligya sa bugas ngadto sa FTI ug ang FTI na maoy mopahigayon sa distribusyon ngadto sa nagkadaiyang lokal nga kagamhanan.
Orihinal nga gipresyuhan ang bugas ngadto sa P26.50 matag kilo apan ang FTI ug ang LGU ang moabaga sa P6.50 aron nga mapalit sa publiko ang bugas sa P20 matag kilo. / ANV