Tag P3.7M bahin sa Cordova, Cebu City sa kita sa CCLEX
File hoto

Tag P3.7M bahin sa Cordova, Cebu City sa kita sa CCLEX

Mas adunahan og P3.7 mil­yunes matag usa ang local government units (LGUs) sa Cebu City ug Cordova human nakuha ang ilang bahin gikan sa toll revenues nga namugna sa Cebu-Cordova Link Expressway (CCLEX) sa ikaduhang tuig sa operasyon niini.

Ang Cebu Cordova Link Expressway Corp. (CCLEC) ni-remit sa bahin sa LGUs niadtong Martes sa buntag, Abril 30, 2024.

Ang Cebu City ug ang lungsod sa Cordova maoy host sa toll bridge nga nagdugtong sa mainland Cebu ug Mactan Island.

Ubos sa joint venture agreement (JVA) tali sa CCLEC ug sa duha ka LGU, ang matag LGU makadawat og usa ka porsiyento nga bahin sa tinuig nga kita sa toll gikan sa ikatulo nga taytayan.

Gilatid usab sa JVA nga ang bahin sa duha ka LGU i-remit kanila matag tuig, dili molapas sa Abril 30 sa matag tuig, sa tibuok 45 ka tuig nga concession period.

Si Cebu City Treasurer Mare Vae Reyes, sa usa ka text message sa SunStar Cebu niadtong Martes, niingon nga ang kantidad adto sa general fund account sa City Government.

Siya miingon nga ang kita gamiton sa pagtabang sa Siyudad sa pagpatuman sa mga programa ug proyekto nga gilatid sa 2024 annual budget.

Gisuwayan usab sa SunStar Cebu nga makuha ang plano ni Cordova Mayor Cesar “Didoy” Suan alang sa bahin apan wala pa kini nitubag hangtod sa oras sa pagmantala.

Sa unang tuig sa operasyon sa CCLEX, ang duha ka LGUs nakadawat og P1.69 milyunes matag usa isip ilang bahin sa kita sa toll.

Ang P33-bilyunes nga toll bridge giablihan sa publiko niadtong Abril 2022. / JJL

SunStar Publishing Inc.
www.sunstar.com.ph