Gituhoang shabu nga nitimbang og 255 gramos nga dunay standard drug price (SDP) nga P1,734,000 nasakmit sa Drug Enforcement Unit (DEU) sa Talisay City Police Station sa Purok Kapayas, Barangay San Roque, dakbayan sa Talisay alas 10:26 sa gabii sa Martes, Nobiyembre 7, 2023.
Ang suspek giila nga si Andrian Aro, alyas Tagodo, 24, ulitawo, taga Sityo Wang-yo, Barangay Alaska Mambaling, siyudad sa Sugbo.
Ang DEU sa Talisay police nakadawat og kasayuran bahin sa kalihukan sa suspek.
Ila kining gipanid-an una gilusad ang buy-bust ubos sa kamandoan sa ilang hepe nga si Police Lt. Col. Wayne Magbanua, uban sa koordinasyon sa Philippine Drug Enforcement Agency (PDEA 7).
Atol ning pagsuwat, ang kapulisan sa Talisay ug PDEA nihimo pa og tactical investigation sa suspek sa pagsuta sa tinubdan sa drugas ug ubang mga kasayuran.