Usa ka mamaligyaay og taho ang gipusil-patay sa Ylaya Road sa Barangay Colawin, lungsod sa Argao, alas 8 sa buntag, Dominggo, Pebrero 4, 2024.
Ang biktima mao si Marphy Intervencion, 43, minyo ug taga Barangay Bonbon, lungsod sa Aloguinsan.
Ang biktima nihunong sa dapit aron pagpamaligya og taho apan gipusil sa mamumuno sa walay igong rason nga naigo sa ulo ug nahagba sa dan.
Matod sa taho sa kapulisan, ang suspek mao na usab kadtong giingong anting-atingan nga si Roel Gomez nga taga Barangay Lengigon, silingang barangay sa Colawin.
Si Gomez maoy suspek usab sa pagpanulis sa magtiayon sa Lengigon niadtong Biyernes, Pebrero 2, 2024, alas 12:00 sa udto.
Ang mga biktimang magtiayon mao sila si Malcolm John McIntire, 59, Australian national ug Miraluna Labrador McIntire, 42. Si Gomez maoy suspek sa kapulisan sa Argao nga nagpusil-patay sa taho vendor.
Sa nakuhang kasayuran sa Superbalita Cebu gikan sa kasaligang tinubdan, nasuta nga ang biktima dugay na nga namaligyag taho sa kabukiran gamit ang iyang motorsiklo.
Usa sa gituohan sa tinubdan nga ang biktima gidudahan sa suspek nga asset sa kapulisan.
Sumala sa kapulisan sa Argao ubos sa kamanduan sa ilang hepe nga si Police Maj. Martin Bartolome, nasuta nga ang suspek nga si Roel Gomez dunay lima ka mga pending nga warrants of arrest.
Kini dunay kalambigitan sa kasong murder, attempted murder, kalapasan sa Republic Act 9165 o Comprehensive Dangerous Drugs Act, ug uban pa.