Natuman ug giinagurahan ang usa ka bag-ong health center, usa ka konkretong dalan, ug usa ka giayo nga laing dalan sa bukirang bahin sa lungsod sa San Fernando.
Gibuhat sa Kagamhanan sa San Fernando ni’ng tulo ka mga proyekto uban sa pag-abag sa Taiheiyo Cement Philippines, Inc. (TCPI) ug Solid Earth Development Corp. (SEDC).
Sunodsunod nga giinagurahan ni Mayor Mytha Ann Canoy ang mga proyekto uban sa pipila ka mga opisyal sa lungsod ug barangay, ug ingon man sa TCPI ug SEDC nga ningduyog kanila, ug mga lumolupyo sa komunidad nga ningsaksi.
Ning-uban silang kapitan Tomas Baclaan ug mga kaubang opisyal sa Cabatbatan kang Canoy sa pagbukas sa bag-ong dalan ni’ng bag-o pa lang sa Sitio Datag ug, uban sa municipal health officer nga si Dr. Alfredo Manugas VI, sa bag-ong health station.
Gipanalanginan ni Padre Cherish Chester D. Serana, kura paruko sa San Agustin de Hippo, ang duha ka bag-ong mga proyekto diin ang TCPI nihatag og 500 ka sako sa Grand Portland Cement alang sa sementadong karsada, samtang ang SEDC ning-amot sa luna nga nahimutangan karon sa health station.
Samtang sa Barangay Magsico, nasaksihan sa mga opisyal sa TCPI ug SEDC ang pagbukas sa laing bag-ong konkretong dalan nga gihatagan sa TCPI og 500 ka sako sa Grand Pozzolan Cement.
Nitambong alang sa TCPI si Moises B. Tañola, tagduma sa administrasyon, sa Cabatbatan uban nilang Efren Labrado, community relations officer, ug Brijade May L. Navasquez sa community and general affairs.
Mao sab alang sa SEDC silang Gines Boltron, community relations officer, uban sa iyang mga kaabag nga sila si Zeny Tapuyao ug Monette Olmoguez.
Sa Magsico, miuban sab sa mayor si Kapitan Mario Sebial ug mga kaubang opisyal sa barangay, uban sab nila ni TCPI HR manager Vanessa Bongcawil ug Mitzie Carin, SEDC HRA division manager.