Dear Papa Joe,
Maayong adlaw. Ako diay si Liza, naa koy problema nga dili ko kahibaw unsaon pag-atubang. Naa koy manghod nga babaye nga 22 anyos pa lang nga nahigugma sa usa ka lalaki nga nag-edad na og 45.
Sa sugod, murag walay problema kay pareho man silang single ug nagkasinabot. Ang lalaki buotan, maalaga, ug kahibalo mohatag ug seguridad nga wala pa niya masinati sa mga kaedad niya.
Apan samtang nagdugay ilang relasyon, nagsugod ko ug kabantay nga murag naa’y kalainan sa ilang panan-aw sa kinabuhi. Ang babaye gusto pa mo-explore, mo-travel, ug magtukod pa sa iyang kaugalingon nga pangandoy. Samtang ang lalaki, gusto na og settling down ug mas hilom nga kinabuhi. Usahay maglalis sila tungod ani, ug ang babaye magsugod na sab ug pangutana sa iyang kaugalingon kon sakto ba iyang desisyon. Papa Joe, dili man ko kontra sa ilang relasyon, pero makita gyud nako nga lisod ang ilang sitwasyon tungod sa dako nga age gap.
Nahadlok ko nga basin sa kadugayan, masakitan ang usa nila kay dili mag-abot ang ilang mga plano sa kinabuhi.Unsa man gyud angay buhaton ani nga sitwasyon, Papa Joe? Sakto ba nga ipadayon ang gugma bisan klaro nga lahi sila og direksyon?
LIZA
Liza,
Maayong adlaw sab kanimo. Ang imong pangutana usa ka tinuod nga kahimtang nga daghan ang makarelate.
Ang gugma dili gyud sukdon sa edad, pero dili sad nato malikayan nga ang edad makaapekto sa priorities, pangandoy, ug paagi sa pagtan-aw sa kinabuhi.
Kon ang duha ka tawo pareho nang hamtong, wala’y sayop sa ilang pagbati. Apan importante gyud nga magpakatotoo sila sa ilang kaugalingong gusto ug sa ilang plano sa umaabot. Ang gugma dili lang kutob sa pagbati—apil pud ang pagsubay sa direksyon nga ilang padulngan.
Ang imong manghod kinahanglan mangutana sa iyang kaugalingon: andam ba siya mosabay sa lifestyle ug plano sa lalaki? Ug ang lalaki usab, andam ba siya mo-adjust para sa pangandoy sa babaye? Kon ang tubag ani kay puno sa pagduha-duha, basin kinahanglan nila maghunahuna pag-ayo.
PAPA JOE
