Dear Papa Joe,
Tagoa lang ko sa pangalan nga Jimmy 47 years old na. Ang akong suliran kay simple ra, naminyo ko og usa ka babaye nga kanhi mobu og lupad ug nasayod ang akong pamilya ug kadugo ani mao nga naka-decide ko mopalayo na lang pagpuyo.
Naa ko somewhere sa Bohol ug naa akong kaliwat sa Danao.
Nagsakit akong mama ug gusto nila nga mouli ko kay sulod sa 15 ka mga tuig wa ko kabisita nila.
Wa man sad mo-mention akong mga ginikanan kabahin sa kaagi sa akong asawa pero mahadlok ko basin inig bisita namo, naay makahisgot nga kaliwat ngadto sa akong mga anak.
Di ko gusto nga mahibaw-an nila unsa ilang mama kaniadto.
Unsa may angay nakong buhaton?
Palihug tambagi ko.
JIMMY
Jimmy,
Naa man gyuy panultihon nga walay aso nga makumkom, moabot gyud na nga panahon nga makahibalo imong mga anak unsa ilang mama kaniadto.
Pero di nana mo-matter nila kon ang imong pagdawat ug pagmahal sa ilang mama tim-os.
Mas ma-proud pa siguro sila nimo, labi na nga gipadako nimo sila og maayo.
Siyempre, sa ilang edad ron makapangutana sad na sila nganong wa sila kita sa ilang mga kaliwat.
Pwede sad unhan nimo sila pagsulti sa maayong pagpasabot kay sa uban pa gikan.
Tan-aw ko mas maayo gikan nimo.
Again, kon maayo pagpakita ninyo ug pagmahal sa inyong mga anak, makasabot ra gyud sila.
Papa Joe
(Sa inyong tampo ipadala lang sa papajoesuperb@gmail.com)