Talk to Papa Joe: Batasan daugon

Talk to Papa Joe
Talk to Papa Joe(SunStar File Photo)

Dear Papa Joe,

Nganong naa may mga tawo nga hawod kaayo ka mabiaybiayon nga kadugo pa gani nimo?

Tawaga lang ko sa ngan nga Nina, 19 anyos, taga Mandaue City.

Unom mi kabuok igsuon. Ako ang ikalima.

Mahibu’ng lang ko kon ila ba kaha ko nga anak sa akong ginikanan kay halos akong mga igsuon bati man og trinataran nako ug insultuhon pa ko sa akong mga maguwang nga babaye nga pasayan daw ko.

Ako sad mga igsuon nga mga lalaki di gani halos makig-istorya nako, gawas lang dunay isugo.

Murag ako ra man pud ang lahi nila og hitsura kay arangan man gyud sila.

Pero ako mura ko og naay depekto sa nawong kay premature baby man ko.

Matod pa nila ni Mama ug Papa nga anak gyud ko nila ug sagdahan lang daw nako ang akong mga igsuon kay walay mga buot.

Mohilak na lang ko sa tago. Makaubos gyud sa self esteem.

Unsaon ko man ni sila? Tambagi ko.

NINA

Nina,

Day, ayaw lang kaayo dibdiba ang pagbiay biay nila nimo kay basin bunga ra na sa kasuya nila nimo kay sa tan-aw nako, naa ang attention sa imong mga ginikanan nimo tungod kay special ka.

Kay nakita nila nimo ang imong naagian dihang gipakatawo ka nga kuwang sa buwan.

Wa man nimo tuod gisulti pero mao nay tan-aw nako nila ug mao nang moingon sila nga way buot imong mga igsuon.

Timan-i lang nga wa magpamatuod nga ang hitsura maoy basihanan sa imong pagkatawo, kon di ang imong batasan ngadto sa imong isig ka ingon.

PAPA JOE

(Sa inyong tampo ipadala lang sa papajoesuperb@gmail.com )

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph