Dear Papa Joe,
Ako si Ana. Usa diay ko ka legally married ug naay anak. Ang nahitabo sa akong kinabuhi kay ang akong husband akong nasakpan nga naay babaye. Naay nahitabo nila sa maong babaye.
Sa pagkahibalo nako, mura ko’g na-depress og maayo. Wala na mi kalinaw sa among pagpuyo kay kanunay naman lang mi mag-away. Sa akong pagka depress, naa koy usa ka officemate nga kanunay mag- encourage nako.
Usa siya ka single. Tuod nahimo kaming close friend ug siya na ang kanunay magtambag kanako kay pirme na man lang ko maghinuktok.
Tungod sa among pagkasuod, niabot gyud sa tempo nga nagkarelasyon mi ug hangtod nga dihay nahitabo namong duha.
Angkunon nako nga nasayop ko tungod ra pud sa binuhatan sa akong partner.
Akong problema kay kining akong nahimong suod ug nakarelasyon kay dili naman ko niya buhian kay nakadesisyon na man siya nga di na siya magminyo kay ako naman ang iyang gusto.
Kahibalo sad ko ani niya kay dugay naman mi nagkauban.
Karon naglibog ko kon unsaon nako pagpalayo o pag- buwag niya. Magpaabot ko sa imong tambag.
ANA
Ana,
Ang sayop dili pwede tul-iron sa laing sayop nga mas makagrabe ang resulta niini.
Kon mahimo lang kang honest ug tug-anan nimo imong bana niini ug makasabot siya, masolusyunan na kay maprangkahan ninyong duha ang lalaki.
Mas maayo gyud nga sultihan nimo siya para masayod ka ug molungtad ba gyud siya nimo kay bisan itago na nimo sa sige ninyong away, magkabuwag ra mo kay may kausaban na man ka.
Di sad na pwede sa inyong kompaniya immoral ang inyong relasyon sa imong kauban.
Luoy sad imong anak ug luoy sad ka kay nagpakasala ka agi ug bawos sa nakasala nimo.
PAPA JOE
(Sa inyong tampo ipadala lang sa papajoesuperb@gmail.com)