Dear Papa Joe,
Tawga lang ko sa pangan nga Gina, 22 anyos. Ako kay gibawalan sa akong mga ginikanan nga makig-relasyon sa among silingan nga ka edad ra pud naku kay lagi wa koy future kay bugoy-bugoy daw. Pero kung ma-fall man gud ambot murag makalimtan man tanan. Ang akong problema ron kay unsaon nako pagsulti sa akong mga ginikanan nga sakto sila kay kini akong uyab niapil ni ug gang-gang maski 22 na ang edad. Gawas pa gyud niana naa kini karon sa bilanggoan tungod sa drugs sad. Ang nakapait lang kay buntis ko karon ug wa ko masayod unsaon naku pagsulti akong mga ginikanan. Sigurado gyud ko nga palayason ko ani. Mao ni nga mangayo ko ug tambag nimo kay naglibug na akong hunahuna.
GINA
Gina,
Kapila na ta nakadawat ug suwat susama ani nga magsilbi untang leksyon sa kadaghanan pero gusto gyung suwayan sa uban ug mao nana ang resulta nimo karon. Wa sad ko masayud sa kalidad sa imong mga ginikanan unsa ilang reaksyon mahitungod niana, kung madawat ba ka o dili pero wa kay laing choice kundili sa pagtug-an nila. Come what may kung unsay desisyon nila. Pero dako gihapon ug tsansa nga madawat ka nila, pero ayaw pagdahom ingon ana ka sayon kay ihilam-os gyud na nimo ang kasaba. Hinaut pa sa mga batan-on nga nakabasa ani magsilbi unta ni nga pahimangno nga di magpadala sa bul-og sa gugma.
PAPA JOE
(Sa inyong tampo ipadala lang sa papajoesuperb@gmail.com)