Dear Papa Joe,
Ako diay si Rommel, 40 years old, pamilyado ug naa ko diri sa Cebu nanimuyo pero akong problema kay about sa akong amahan nga naa sa Mindanao kauban ang akong mga igsuon.
Ni-enter man gud ni akong mga pag-umangkon og vlog. Mga anak ni sila sa akong mga maguwang. Unya ilang gihimo’ng content ang akong amahan nga ilang gipaka ulitawo kay byudo na lagi. Di lang nako idetalye unsay gibuhat sa video pero wa ko nakauyon kay nasayud ko nga wa nasayud si Papa niini kay no read, no write intawon. Mosugot ra unsay isugo.
Unya pag basa nako sa comment kay puros naman bugalbugal ug sakit kaayo paminawon isip anak. Ako dayon nga gitawagan akong mga maguwang ug ningtubag ra man sila nga pang content lang daw. Nakasabot ba kaha sila ana ug ang akong amahan? Di daw nila i-delete kay nag trending daw sa amo. Unsa may buhaton ko? Palihog tambagi ko.
ROMMEL
Rommel,
Kon interesado ka nga mabadlong na nimo, mas maayo nga mouli ka sa inyoha sa Mindanao para mapasabot nimo sila tanan ug ang imong amahan. Kay basin wa sila masayud sa psychological effect ana sa hingtungdan ug sa ubang mga anak sama nimo.
Basin ilang gipakabug-at ang kwarta nga madawat nila sa pag post ana ug ambot lang sad kon nasayud ba si Papa nimo ana ug may nadawat ba. Ang problema ana inig uli nimo didto ug sa kasuko nimo, gibidyuhan na hinuon ka ug ma shock na lang ka nga mag viral ug ingnon lang ka nga for the content.
PAPA JOE