Dear Papa Joe,
Tagua lang ko sa pangalan nga Diomedes, 30-anyos na ang panuigon, ug usa ka kanhi OFW pero nauli ra ko sa Pilipinas dayon kay nasakit.
Sa unang mga tuig nako sa Dubai, tanang suweldo nako isip waiter kay ako ra gyud gipadala sa akong mga ginikanan kay ulitawo pa man ko. Para makaskwela akong mga manghod ug kay gusto man sa akong mama ug papa nga mapaayo among balay, akong gipa-renovate ug dakudako gyud pero tungod sa akong sitwasyon nga nasakit, wala mapadayon ug human ang balay kay nauli ko diri kay na-stroke ko.
Ang nakasakit lang kay imbes alimahon ko sa akong sitwasyon, puro na man hinuon bati akong madunggan. Akong mga igsuon magmug-ot ang nawong kay lagi wala sila katiwas ug eskwela kay naundang.
Akong mama sige og yawyaw asa ug igasto. Unya ako pa ang basulon kay abusado daw ko sa lawas, sige kaon ug lami sa Dubai.
Wala sila masayod nga ni-give up akong lawas sa kakapoy.
Karon usahay makahunahuna ko maypa mobiya na lang ko aning kalibutana kay gigamit ra man diay ko.
Hinaot nga lamdagan ko nimo sa dili pa ko makadesisyon.
Diomedes
Diomedes,
Ayaw lang sa dayon ug conclude basin nakalitan lang na sila sa sitwasyon nga ikaw ra sad gaanad.
Dili sad siguro ikaw gibasol pero wala lang silay kapahungawan sa ilang gibati ug ikaw sad, ubos ang pamati tungod sa imong sitwasyon mao makaingon ka tungod nimo.
Ayaw paghunahuna og bati dong kay bata pa kay ka oy, 30-anyos. Dako pa ka ug chance nga mabalik sa normal labi na dunggon sa Ginuo imong pag-ampo.
Kon ok nimo, diretsuha imong mama ug pangutana nga kargo ba ka nila, ikaw ba ilang gibasol? Ug kon ikaw man gani, aw lahi sila nga pagkatawo. Gigatasan ra ka anang kalakiha.
Again usbon ko ayaw sa ug hala hala, paminawa sa sila ug timbangtimbanga ug kon dili pabor nimo ilang tubag, timan-i dili pa ulahi ang tanan.
Papa Joe
( sa inyong tampo
ipadala lang sa papajoesuperb@gmail.com)