Talk to Papa Joe: Gilumpong
Dear Papa Joe,
Tagua lang ko sa ngalan nga Maria, 25 years old, usa ka katabang apan graduate baya ko og college. Galisud lang ko og pangaplay.
Karon ang akong suliran kay akong nakarelasyon ang bana sa akong amo ug di lang na, hasta pa ang anak nilang ulitawo.
Ambot unsay nasulod sa akong ulo nga murag nadani man ko sa haylo sa bana sa pasalig nga paiskwelahon ko unya paundangon ko og trabaho ug itago lang ko niya.
Unya baya naa ko sa ilang anak nahigugma.
Ang problema pa gyud kay duha na ko ka buwan nga wala tungahi sa akong mens unya ako silang giingnan, mura naman og nilikay.
Unsa may buhaton ko?
MARIA
Maria,
Mao na na diha, niresulta na. Dako gyud nang iskandalo labi na duha ka lalaki ang na-involved ug kadugo pa gyud.
Mahug gyud ka nga gikalingawan nila ana. Hinuon magkagubot gyud ang ilang pamilya tungod sa inyong binuhatan, pero ila na na.
Ang importante ang imo. Unsaon na nimo, what if walay mangamahan?
Ang buhaton nimo diha mao ang paghawa na lang diha samtang sayo pa.
Kon mabdos gyud ka, pakatawha na lang gyud na kay naa naman na ug pasabta lang gyud ang imong mga ginikanan nga nadala gyud ka sa pasalig.
Unya kon makalingkawas na ka ana, ayaw na tawon og binuang kay kabalo man ka nga binuang na ang imong gisudlan kay amahan ug anak gud na.
Tarunga na imong kinabuhi inday nga di sad ka makadaut sa uban
PAPA JOE
(Sa inyong tampo ipadala lang sa papajoesuperb@gmail.com)