Dear Papa Joe,
Tawaga lang ko ug Mariza, 24 years old nga taga Norte sa Sugbo. Ang akong suliran kay kabahin sa akong pares, yes pares kay dili pa man mi kasal.
Kini siya man gud sa pagmabdos nako kay feeling nako wa gyuy kausaban, sige lang gihapon kuyog sa iyang mga barkada, mag-inom as in mura gyud ug ulitawo.
Ako maoy nagtrabaho pa gani maski mabdos ko pero dihang nanganak na ko, niundang ko ug siya nay nagtrabaho. Pero dili man sad mohatag maski pangbata lang unya masuko ug pangayuan ug dayon ingon nga wala siyay kuwarta.
Ganahan na ta ko mouli sa amo pero kasab-an ra ko sa akong pamilya kay nabuhat na ko ni sauna ug giingnan ko nila nga gahi man ko ug ulo mag-antos daw ko. Mao ni akong suliran, unsay matambag nimo?
MARIZA
Mariza,
Uli na lang ug dili madala ug tunla imong pride kay sakto man gyud imong mga ginikanan, sa sinugdanan pa lang klaro nga gibadlong ka nila kay bata pa siguro ka pero tungod lagi sa gugma mao nga nipadayon ka.
Wala man kaha ka ingna nila ayaw pakita ug dili ka madawat? Surrender na lang didto ug dawata imong mga sayop.
Maluoy ra na sila kay naay apo, pero kon gusto nimo i-fight imo katungod, pwedi na nimo ipa-barangay imong pares kay kon wala ko nasayop, na-fall na imong kaso sa violence against women and children (VAWC).
Basin pa diay maymayan sa barangay ug makamatngon siya sa iyang sayop.
Dili na man nato mabalik pa kon nagbasol ka man, importante nga focus ka sa kaugmaon sa imong anak karon.
Papa Joe
(sa inyong tampo ipadala lang kana sa papajoesuperb@gmail.com)