Talk to Papa Joe: Kasuyaan

Dear Papa Joe,

Tawaga lang ko og Satur, 40 anyos na ang panuigon.Ang akong suliran kabahin sa trabaho. Kini man gud akong supervisor murag masina. Kon naay assignment among boss, para niya ako iyang sugoon pero inig report niya sa among amo angkunon niya.

Karon sa akong kakugi makita man gyud sa uban nga kauban namo ug mismo sa among amo ug daygon ko nila. Iya ning ikasina ug ikasuko. Iya dayon dugangan ang akong trabaho, sugo diri sugo didto.

Na-stress na ko kaayo ug nagkasakit. Ingon pa sa akong asawa maayo pa moundang ko sa traabaho kay sa mamatay ko og sayo sa stress. Unsa may angay kong buhaton? Please tambagi ako.

SATUR

Satur,

Ayaw lang pagpada ana. Tinuod sad ingon sa imong asawa nga kon magdugay ka diha basin mao ra nay ikasakit og maayo nimo. Kon asset ka, pwede ka mangita og laing trabaho total kon ni care ang imong amo nimo mangutana man na sa rason. Unya pwede na nimo isaysay didto ang unfair nga practice sa imong bisor nimo.

Huna-hunaa imong lawas kay lawas ray puhunan ug di nato malikayan makaamo og bisor nga ing ana. Pero kon wa na kay laing padulngan pwede sad ipalapos ra na nimo sa pikas dunggan ang tanan.

PAPA JOE

(Sa inyong tampo ipadala lang sa papajoesuperb@gmail.com)