Dear Papa Joe,
Ako diay si Daphny, taga Bohol ug magbasahan ko online sa imong column. 19 anyos diay ko ug may kapuyo ug naa mi usa ka anak.
Angkunon nako nga may batasan sad gyud ko nga usahay pa gani maalaan kong boang sa akong mga silingan o paryente.
Siguro naa lang gyud ko problema sa panghuna-huna pero di gyud ni nako tinuyoan.
Karon magsige na lang ko og hilak kay hasta akong pares wa nay pagtagad nako ug sa among anak kay nabuang na sa bisyo, inom ug drugas o basin naa pay lain.
Mangayo ko og tabang sa akong mga ginikanan di sad sila motabang nako bisan na man lang para sa bata.
Kon ang akong paris akong sukmatan kay iya man ko kulatahon.
Unsa may angay nakong buhaton niiini? Hinaot imo kong matambagan.
DAPHNY
Daphny,
Day, basin gisukod ra ka sa imong mga ginikanan sa imong binuhatan kay bata pa ka nisulod ka anang butanga ug grabe siguro imong depensa sa imong pares mao na lain sila nimo.
Nakahibalo sila daan nga way ayo kanang lakiha pero nagpadayon gihapon ka.
Ako pa nimo mouli ka sa inyoha ug tunlon mo ang imong garbo ug magpaubos ka nga mangayo og pasaylo kanila.
Masabtan ra ka ana pero ayaw pagdahum nga panggaon ka sama sa una kay lagi nasagmuyo sila.
Kanang pares nimo patagma na, ikiha na og VAWC. Duol sa women’s desk sa inyong kapulisan para motagam na. Kana lang, Day. Ayaw padala sa tama nga tungod kay love ka niya kay wa man siya magpakita og love ninyo.
PAPA JOE
(sa inyong tampo ipadala lang sa papajoesuperb@gmail.com)