Dear Papa Joe,
Alyasi lang sa ko ug Lalay, 19 years old ug may ka live-in na. Nagtipon na mi sa akong uyab paps kay nabuntis ko ron. Ang akong problema kay wala man ko mauyoni sa iyang pamilya.
Sige lang ko padungog-dungogon nga tapulan daw ko ug manghinan-aw ra daw ko sa mga bulohaton sa balay, labi na ni iyang igsuong babaye.
Unsaon man sad nga konmolihok ko ingnon man sad ko nga dili mao akong gibuhat.
Magpanginto gyud ko, labi na karon nga buntis ko unya mag-utan sila unya dili man ko mokaon kaayo ug utan, masuko sila nako kay hilas ra daw ko nga mamili nga dili man ko anak ug dato. Mas maayo pa kuno mga dato kay mokaon ug utan.
Sakitan baya ko unya dili man sad ko kauli sa amo kay suko man kaayo akong mga ginikanan. Unsa may angay nakong buhaton? Tambagi ko.
LALAY
Lalay,
Una, mag-antos gyud ka diha kay nangipon ka man. Usa unta ka nisulod ana kay gisigurado usa to nimo imong seguridad.
Mao na ang resulta sa wala nimo pagtuo sa imong mga ginikanan. Mao bitaw suko sila nimo kay wala ka maminaw nila, giuna gyud na nimo.
Maayo unta og naglahi mo para dili ka mabantayan permi o basin wala sad nay maayong pangita ang imong ka-live-in.
Kay kon naa pa way yawyaw ang pamilya ana kay mangumpra na permi og karne, dili magsige og utan. Dili pa na mao, samot na og manganak na ka.
Mas maayo kon naay panginabuhi imong ka-live-in kay maglahi na lang mo.
Dili gyud maayo mangipon kay dili sa tanang higayon makaugangan mo og modawat nimo, kay sama nimo nalain imong mga ginikanan, pareho ra sad na sa mga ginikanan sa imong pares nga dako pa kaayo og damgo para niya o para nila.
Pero napalaw kay nisulod man og uyab-uyab.
Papa Joe
(Sa inyong tampo ipadala lang sa papajoesuperb@gmail.com)