Dear Papa Joe,
Nisuwat dayon ko aning akong problema ba ug hinaot unta mabasa nimo ni kay na timing gyud ni aning lumay-lumay nga isyu. Ako diay si Marriel 27 years old ug single mom.
Kini akong problema about ni sa lumay kay mao ni ang rason sa amahan sa akong anak ron.
Nagkaila-ila diay mi ani niya sa Facebook lang ug nagkita ug nagkakami, dayon naka-decide nga magpuyo sa kay wala pa may kwarta ipakasal. Pero sa dihang nimabdos na ko nausab na siya kay nausab na daw akong porma, dili na daw ako ang kanhi niya nakita nga sexy. Hangtod sa kalit lang gibiyaan ko niya kay niuban sa laing babaye nga sexy ug matod niya dili daw siya mopadayon nako kay gilumay daw nako siya.
Mao ni akong suliran ron kay luoy tawon among anak kay wala gyud ni siyay sustento, nangipon lang mi sa akong inahan. Unsa may buhaton ko? Tambagi ko.
MARRIEL
Marriel,
Kon dili siya nimo ayaw pamugos, feeling niya gilumay siya kay ang imo ra mang sexy nga lawas iyang nagustuhan.
Siguro pag-una ninyong kita nga makaingon tang literal nga lumay, nabighani ba kon sa tagalog pa. Karon nga nagmabdos ka, dili man gyud na kalikayan ang kausaban unya wala siya mag-expect sa pweding resulta sa magbuntis mao nga na ing-ana siya.
Rason ra gyud na niya ang lumay kunuhay kay sa tinuod dili pa gyud na siya andam diha nimo. Pasuportaha na sa inyong anak, ipabarangay na para matagam.
Papa Joe
(Sa inyong tampo ipadala lang sa papajoesuperb@gmail.com)