Talk to Papa Joe: Maayo lang sa una

Talk to Papa Joe: Maayo lang sa una
Talk to Papa Joe(SunStar File Photo)

Dear Papa Joe,

Tawaga ko sa ngalan nga Mary, 18 anyos ang edad, taga Danao City, Cebu. Naproblema ko karon sa akong sitwasyon.

Naa man gud koy uyab nga 22 anyos ang edad ug classmate nako ni siya. Pinangga kaayo ko niya mao nga wa na ko malikayi nga nahatag nako ang akong pagka babaye. Sa laktod nga pagkasulti nahigam mi sa maong buhat kay niabot pa man og pipila ka buwan wa gyud ko mamabdos.

Matod pa niya nako nga nindot kuno kon magminyo mi kay wa nay makapugong pa namo sa among buhaton kay amo gyud kunong suliton ang kalipay sa usa’g usa. Ing-ana ka sayon lang para namo nga mura ba og salida sa sine lang tanan.

Gatuo akong ginikanan nga tarong ko ug sige pa gyud sila og pahimangno nako nga basin mabuang ko sa uyab-uyab.

Sa wala damha nabuntis ko karon ug mao ni akong problema kay gusto sa akong uyab nga ipakuha ang bata kay di pa kuno siya andam.

Kon ipadayon nako ang pagmabdos kay makigbuwag siya. Unsa may angay nakong buhaton?

MARY

Mary,

Buhata ang angay, imong pakatawhon ang imong gisabak karon kay wa nay labot ang inyong gihatagan og kinabuhi.

Mao man nay giingon nga ulahi na ang pagbasol pero naa naman na, mao nga padayuna na ug sultihi ang imong ginikanan ug dawata na lang ang ilang kasuko kay nasayud man ka nga imo nang gituyoan.

Sa pagka karon, ingna ang lalaki nga kon di na siya nimo, kinahanglan suportahan niya ang imong anak o ipabarangay nimo siya kay obligado baya siya ana.

Basin pa diay kon mausab ang huna-huna ug barugan niya ang iyang obligasyon.

Karon kay naa naman na, buhata ang pagpakatawo nga himsog anang bataa.

PAPA JOE

(sa inyong tampo ipadala lang sa papajoesuperb@gmail. com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph