Dear Papa Joe,
Normal ra ba nga mangilabot ang ginikanan sa akong bana sa away namo.
Tawaga lang ko sa alyas nga Maria, taga Manduae, 25 years old lang ko ug bag-o lang mi gikasal sa akong bana sa huwes pero tulo nami katuig nga nag-ipon.
Tungod lagi kay nimabdos ko napugos ko ug tipon sa ilaha kay akong bana wala pamay tarong nga trabaho ug usahay magsalig ra sa iyang parents.
Di namo malikayan nga mag-away kay lagi nilutaw na ang tinuod nga batasan sa akong bana nga wa pa gyud diay matagbaw sa pagka ulitawo, maski naa nami anak magsige lang gihapon og laag ug kadlawon na mouli ug duda naku niintra na pud ni og suyop.
Inig away namo dako kaayo ni siya og tingog ug unya mogawas dayon iyang mama ug pangasab-an mi.
Ang problema kay ako pay basulon sa iyang mama nga dili unta daw maing-ana ilang anak kung wa ko moabot sa iyang kinabuhi.
Mohilak na lang ko, ganahan na unta ko mouli sa amo pero basin kasab-an sad ko sa akong mga ginikanan. Unsa may buhaton nako? Palihug tambagi ko.
MARIA
Maria,
Ang akong matambag nimo kay mas maayo na lang nga mouli ka sa inyo ug bahala og kasab-an ka sa imong mama o papa at least kadugo nimo ug ang sermon siguro bahin sa pagminyo ug sayo kaysa kasaba anang imong in-law nga insulto sa imong pagkatawo.
Ayaw lang gyud suklii imong mga in-laws kay nangipon man sad gud mo ug napuno na sad na siguro sila nga nahulog na nuon mo nga obligasyon nila kay wala man kahay klarong trabaho imong bana.
Total og makaamgo imong bana ug mag-usab siya unya apason mo pwede mana pero make sure nga kung magbalik mo og puyo kanang inyong kaugalingon na.
Papa Joe
(sa inyong tampo
ipadala sa papajoesuperb@gmail.com)