Dear Papa Joe,
Mangayo diay ko og tambag nimo sir. Ako diay si Libeth, di tinuod nga pangalan. Ang akong problema kay may ka-live in ko sa una ug nakaanak gyud mi apan ang problema, naa siyay batasan nga mura’g babaye ba.
Tinuod may pagkayawyawan sad ko kay kinsa man sab di maglagot ana nga wa may intrigo-intrigo og sweldo kay kuwang ra sa bisyo mao to naka-decide ko makigbuwag niya.
Tuod man after tulo ka mga tuig, nakakaplag ko og laing hinigugma ug gidawat ko sa iyang pamilya kon kinsa ko ug gipakaslan ko niya.
Pagkasayod sa akong ex nga naminyo ko ug nimabdos ron, gusto sa iyang side nga kuhaon ang akong kamaguwangan nga anak kay lagi nana ko’y lain.
Pugson ra ba gyud ko nila ug kon makahigayon gyud daw sila kay ila gyung kuhaon ang bata, palihug tambagi ko.
LIBETH
Libeth,
Una sa tanan maayong adlaw nimo. Kumon na gyud ning sitwasyona no nga ang maipit gyud klaro ani kay ang bata.
Kon ang balaod lang sundon, di gyud na niya makuha ang bata kay di mo kasado, maski pa gani og kasado basta minor ang bata sa inahan man gyud og magkabuwag.
Karon sa imong bahin, duol sa inyong barangay para matabangan ka ma-endorse sa DSWD o ba kaha patabang ka sa imong bana ug duol mo sa mga polis kay kabalo sad na sila sa balaod kabahin niana.
Kon pugson man gani na nilang kuhaon, pwede silang pasakaan og kaso ana, dili ko abogado ha, pero base na sa mga nadungog na nato nga mga problema sauna.
Pero mas maayo nga magkaestoryahanay mo sa civil nga pamaagi para sa welfare o kaugmaon sa bata. Hinumdomi ang bata ang magsagubang sa sitwasyon nga inyong gisudlan.
Papa Joe
(sa inyong tampo kay ipadala kana sa papajoesuperb@gmail.com)