Dear Papa Joe,
Tawaga lang ko og Bai, patambag unta ko nimo. Ngano kaha nga sa time mo-contact ko sa akong anak nga tua sa ex-GF nako, magselos man akong asawa nga wala man ko’y gibuhat nga sayop? Ang ako lang Papa Joe nga maka-contact lang ko sa akong panganay nga anak kay love kaayo nako akong mga anak Papa Joe. Ana man gud ni Papa Joe, kato nagpatambag ko nimo sa una, na-okey nato, bali nagtunga na mi sa among duha ka mga anak. Ang akong kinamaguwangan nga anak maoy gipili niya, ang ikaduha naa nako. Mao mangita gyud ko og time para lang maka-contact ko sa akong anak Papa Joe. Pero lagi, talagsa ra gani ko maka-video call sa akong anak, magselos man akong asawa, naglibog ko. Unsay angay nako buhaton Papa Joe, God bless Papa Joe, my favorite Papa Joe.
Bai,
Wala kay sayop nga gusto nimo makig-contact sa imong anak. Bisan pa og nagbulag mo sa iyang mama, amahan gihapon ka ug natural lang nga mingawon ka ug gusto kang makig-video call sa imong anak. Pero importante usab nga istoryahan ninyo sa imong asawa ang iyang kaselos. Sultihi siya nga dili ang imong ex ang imong gipangita, kon dili ang imong anak. Ang gugma sa usa ka amahan sa iyang anak dili dapat mahimong hinungdan sa panagbangi sa inyong relasyon.
Paningkamoti nga transparent ka sa imong asawa ug kon mahimo, apila siya sa pagsabot sa imong sitwasyon. Ang importante, dili nimo pasagdan ang imong anak, apan dili usab nimo pasagdan nga madaot ang imong kaminyuon tungod sa sayop nga pagsabot.
Ang pagka-amahan dili mawala bisan nagbag-o na ang inyong kahimtang isip magtiayon. Ang kinahanglan ninyo karon mao ang pagsinabtanay, pagsalig, ug klarong komunikasyon.
Papa Joe
