Talk to Papa Joe: Nabuntis sa lain

Talk to Papa Joe
Talk to Papa Joe(SunStar File Photo)

Dear Papa Joe,

Ako diay si Kongards ug naa ko karon sa Manila para mo-take og exam para Korea.

Mobasa gihapon ko online.

Ang akong problema kay akong asawa mimabdos sa laing lalaki.

Magsige man gud mi og away kay lagi tindero ra ko og ice cream maong nanimpad ko kay siya may mas dako og kita kay nagtrabaho siya sa usa ka tindahan.

Taudtaod na mi way dulog ani niya kay nasilo lagi ko nga awayon lang permi kay salig nga di ko kasukol niya.

Gawas siya maoy gabuhi namo sa among mga anak, nangipon pa gyud mi sa iyang parents.

Apan nakauli ko diha sa ato ug naay nahitabo namo kay siya maoy nanguna.

Pero karon manganakay na siya ug sa akong kwenta di man gyud akoa ug niangkon siya nga di ako ang amahan kon di iyang kauban sa trabaho.

Wa na ko mouli diha. Sakto ba akong gibuhat?

KONGARDS

Kongards,

Ako pa nimo, ulion nimo ug mag-istorya mo og tarong kay naa man moy anak.

Nasayud ta nga di gyud na lalim iyang gibuhat pero amahan man ka ug naa kay obligasyon sa imong mga anak.

Kon makigbuwag ka niya o mokiha ka, pani­nguha nga di maapektuhan pag-ayo ang pagpadako nimo o ninyo sa inyong mga anak.

Di ko mosulti nga pakigbalik pero naa ra gyud na ninyo.

Basin kon magbalik mo, mosamot inyong kagubot.

Ako lang ayaw sad ihan-ok sa imong asawa tanang sala kay basin may pagkuwang sad ka.

Pero di na excuse nga mangabit o magpa mabdos siya og lain.

Again, hunahunaa ang makaayo sa imong mga anak.

PAPA JOE

(Sa inyong tampo ipadala lang sa papajoesuperb@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph