Dear Papa Joe,
Magpatambag diay ko nimo. Tawaga lang ko sa angga nga Timoy, hingkod na akong edad, naay pamilya asawa ug anak usa.
Nag-trabaho nako pero nitiwas ko sa pagtungha pinaagi sa ALS ug nakaluy-an nakahuman ug naka-award sad.
Ang ako lang kay naninguha ko para makakaplag og maayong trabaho para makatabang ko sa akong mga ginikanan ug mga igsuon para mahuman.
Karon dungandungan mi og human sa akong manghod nga ni-graduate sa high school with honors. Pero nalain ko kay mas gidayeg ug gi-congratulate pa nila akong igsuon.
Abi kay award ra man ako unya akong manghod medalya. Nalain ko paps ug nainsulto. Sakto ba ni akong gibati ngadto nila? Palihog tambagi ko.
TIMOY
Timoy,
Ang imong estorya kay anggid-anggid sa estorya sa prodigal son. Kon wa pa ka kabasa o kadungog ana, i-search lang sa bibliya o ba kaha sa internet.
Di man angay nimo silosan imong igsuon, ubanay angay ka ma-proud niya nga naninguha siya.
Wa na lang seguro ka i-congratulate sa imong pamilya kay nakita na man nila imong effort nga di na seguro kinahanglan pang isulti ug usa pa, igo na kana nga napamatud-an nimo sa imong kaugalingon nga kaya nimo.
Pero di sad ko kabasol nimo ngano ing-ana imong gibati kay tawo baya ta. Pero kon imo na lang nang sabton ug di buhatong isyu sa kinabuhi, mas samot gipamatud-an nimo imong kamalaamon sa reyalidad sa kinabuhi. Ikaw naay pamilya na, naay trabaho pa, imong manghod medalya pa wa pay kaseguraduhan inig college ug igka human makatrabaho ba.
Papa Joe
(Sa inyong tampo ipadala lang sa papajoesuperb@gmail.com)