Dear Papa Joe,
Magpatambag diay ko nimo sir, ako diay si Leng-leng, 29 anyos na ang edad ug may kapuyo. Maayo man akong pares labi sa akong mga anak duha pero dili siya ang amahan pero iyang gidawat nga murag iyaha gyud.
Ang nakaapan lang kay sulod sa among pagpuyo kay wala man koy nakitang pag-asenso kay diskarte diskarte ra gyud iyang pangita, unya ang mga bata nagtubo baya ug mangiskwela na.
Hangtod nga nahibulong na lang ko nga nawala man akong gugma niya. Naglibog ko og mopadayon ba ko or dili na lang, labi na karon nga nagsabak ko sa amo na gyung anak.
Mag-away na lang mi permi kay ako man sad siyang awayon ug buybuyon sa iyang mga saad. Sakto ba ko? Palihug tambagi ko.
LENG
Leng,
Una sa tanan ayaw pagdalidali ug desisyon, basin magmahay ka. Basin bunga lang na sa imong kasagmuyo sa inyong sitwasyon. Siguro na man sad kabalo na ka unsa siya dihang nagkarelasyon mo.
Basin tuod og naninguha siya pero dili pa gyud igo labi na may anak mo nga giatiman. Kon makigbuwag ka niya, mag-unsa na man lang ka nga magtulo na man inyong mga anak?
Naa pa kahay laing lalaki nga andam modawat nimo ug sa imong mga anak sama sa pagdawat niya nimo? Hinuklugi sa na ug storya sa mo para walay mahay, and lastly pag-ampo nga moabot ang inyong gusto maabot sa kinabuhi, Salamat.
Papa Joe
(sa inyong tampo ipadala lang sa papajoesuperb@gmail.com)