Dear Papa Joe,
Usa ko ka content creator. Ako diay si Jamil, di lang nako isulti unsay akong page kay di man ni pang-promotion ako, patambag lang gyud.
Sa una, gasugod ko kay puno ko sa kantiyaw sa akong mga paryente kay duol ra man mi og mga balay sa bukid.
Bisag unsa na lang gud ako i-video para lang ma-follow hangtod nga bugalbugal na gyud nila sa buhaton nako.
Naa pay ga-video ko, ila bulabugon. Makita sa akong video nga nakahilak ko kay akong gibuhat giapil nako sila sa video nga nagbiaybiay nako nga di gyud scripted.
Karon kay ni-viral man pero wa sila masayod nga giapil nako sila.
Karon kay naa na may mo-sponsor nako ug nag-monetize nako gamay ug napa-renovate nako among balay, diha pa sila nituo.
Diha na sad sila ni-follow ug magpabayad man sila kay kon wa daw sila, di ko mosikat. Unsa may ikatambag nimo nako?
JAMIL
Jamil,
Timan-i, way mohatag og interest sa bunga nga hilaw pero kon mahinog na ni ug di maabot kay batuon.
Ing-ana ang kinabuhi bay, padayon lang, ayaw lang sila boyboya kay tinuod man sad nga nakatabang sila nimo.
Ikaw na lay mosabot kay di man mo pareho og level sa hunahuna ug pangisip.
Timan-i nga maski unsa atong kalisod nga naagian tungod sa mga tawo, apil na sila sa atong kalambuan ug di angay dumtan kay instruments na sila para mas makab-ot nato atong mga damgo.
Way lami ang pelikula kon puros bida. Hinuon be kind nila ug tudloi kay basin mao sad nay papel nimo para mas molambo pa ka sa imong kinabuhi.
Papa Joe
(Sa inyong tampo ipadala lang sa papajoesuperb@gmail.com)