Talk to Papa Joe: Way baruganan

Dear Papa Joe,

Ako si Jovert, 28 anyos, taga Talisay, Cebu, ug ulitawo pa. Sa una, pahinante ko sa usa ka shop, dihang nakaila ko sa usa ka babaye nga nagtrabaho sa atbang.

Kada kita nako niya, maluoy gyud ko kay murag pobre kaayo siya, ug sa akong pagkaluoy, naghatag ko niya ug pagkaon. Tungod sa among pagkasuod, nagka-mutual understanding mi hangtod nga adunay nahitabo namo ug nagbunga.

Gusto niya nga panagutan nako ang iyang gisabak, pero dili pa ko andam magminyo kay lisod ang sitwasyon. Karon, nilayas ko ug naglibog ko unsaon siya. Kabalo ko nga nasakitan siya pero di man ko andam. Unsay ikatambag nimo nako paps?

Jovert,

Unsa sa tanan, di mi kabuot nimo kay ikaw man na ug imo man nang kinabuhi pero ang ako lang , suwayi ug butang imong kaugalingon sa kahimtang sa usa ka tawo nga kabalo ka naglisod pero samot nimong giduot ang iyang pagkatawo sa ubos, gawas nga gipalaum nimo, gipun-an pa gyud nimo ug laing problema.

Kung nagpakabana ka sa resulta ana daan wa na unta nimo dayuna. Naa ra nimo dong kung makonsensya ka sa imong gibuhat, kay naay bata nga mogawas nga way kasiguraduhan sa umaabot.

Papa Joe

(sa inyong tampo ipadala lang sa papajoesuperb@gmail.com)