Sa tinguha nga makabaton og luna sa sunod nga round sa 2025 Maharlika Pilipinas Basketball League (MPBL) season, opisyal nga gikuha sa Cebu Greats ang Sugboanong kanhi magduduwa sa Philippine Basketball Association (PBA) nga si Mac Tallo.
Si Tallo, kinsa two-time Most Valuable Player (MVP) sa Cebu Schools Athletic Foundation, Inc. (CESAFI), nikompirmar nga gibuhian na siya sa iyang kanhi team nga Pangasinan Heatwaves.
Kuli na man tuod nga makaabante sa sunod round ang Greats apan malaumon si Tallo nga hangtod aduna pa’y paglaom, buhaton nila ang tanan aron makabangon sa kasamtangan nilang sitwasyon.
Dihang bag-o na ang management sa Cebu squad, nga kanhi gitawag og Classic, ubay-ubay na nga Sugboanong mga magduduwa ang gikuha sa Greats.
Unang gipangkuha sa Greats ang laing mga ex-PBA nga sila si JR Quinahan ug Paul Desiderio ug hasta sila si Reeve Ugsang ug Jun Manzo.
Gikuha sab sa Greats ang laing ex-PBA nga si Junthy Valenzuela isip head coach.
Niadtong Enero 24, ningkombati ang Greats batok sa two-time champion Pampanga Giant Lanterns. Napilde man tuod ang Greats ning sangkaa, 66-69, apan nakahatag kini og saktong engkuwentro batok sa Giant Lanterns.
Ang Greats, nga kasamtangang adunay 4-13 nga rekord, nagkinahanglang modaog sa tanan nilang nahabiling 10 ka mga duwa aron makasulod sa playoffs.
Sugdan sa Greats kining grabe ka tungason nga tahas pinaagi sa pagpakigbatok sa Binan Tatak Gel Beast Motorcycle GameX karong Hulyo 3. / JBM, ESL