Dear Noy Kulas,
Maayong adlaw ninyong tanan. Itago lang ko sa name nga Ling, minyo na, apan wala pa mi anak sa akong bana after seven years sukad sa among kasal. Kining akong bana hilig kaayo ni moduwa og basketball ug uban pa. Himarkada kaayo. Dili ni siya magpuyo sa balay ug usahay dili makauli kay molaag og layo kuyog sa mga barkada. Ako lang sagad mahabilin sa balay kay naay weekend nga diretso na sila sa ilang mga laag sa iyang barkada.
Ako na siyang gibadlong pero wa gi-serious ang akong gisulti niya. Wala na gani mi time kon working days, bisan weekend o holiday, talagsa na lang mi magkauban. Dili gani siya mangumusta nako nga ako ang nahabilin sa balay. Unsa kahay akong buhaton? Wala gyud nako ma-feel sukad nga ako siyang bana. Dili maminaw kon sultihan. Please tambagi ko, Noy Kulas. Daghan kaayong salamat.
LING
Ling,
Kon wala siya nag-function isip imong bana, istoryahe siya nga mao na ang imong na-feel. Iapil sab ang iyang pamilya, labina ang imong mga ugangan aron sila makahibalo sa gibuhat sa ilang anak. If naa siyay mga igsuon, labina if naa siyay suod ana nila, mao sab ang imong istoryahan aron magtinabangay sila sa pagmaymay nianang imong bana.
If dili mausab, suwayi ang pagbiya sa inyong balay ug uli sa inyoha. Basin sama sa ubang mga bana mahigmata siya. Kon tan-awon, gipakagamay ra ni sa uban apan ang wala pagpakabana sa usa ka partner sa kaminyuon dako kaayo na nga sayop nga mahimo gani nga basehanan sa pagpasaka og petisyon sa annulment sa kasal. Busa balido kaayo ang imong reklamo labot sa imong bana. Mag-unsa ang kaminyuon kon ang usa ka partner way pakabana, way pagtagad? Dili man na duwa-duwa ang kaminyuon. Seryuso kini nga commitment, naa may anak o wala ang magtiayon.
Dili katarungan nga maglaroylaroy siya kay nagtuo siyang okay ra kay wala moy anak. Naa man siyay responsibility alang nimo. Mao na nga mas maayo nang mag-istorya mong duha, demand og time as his wife, dili lang kay ipakisama o isipon kang ordinaryong babaye sa iyang kinabuhi. You deserve respect, care and attention kay inyo nang gipanumpaang duha sa dihang gikasal mo. Basin pa mao na ang makapausab niya.
NOY KULAS
rojval69@yahoo.com