Dear Noy Kulas,
Maayong adlaw ninyong tanan. Ako si Downey, ulitawo pa bisan 33 years old na ko. Dili bitaw ni lumba ang pagminyo pero ganahan na gyud unta ko.
Tulo na ka babaye ang niagi sa akong kinabuhi. Pulos nako sila nakapuyo pero wala nadayon kay gibiyaan ra ko nila.
Ako lang gyud gipangita nila anak ug kanang babaye nga mabilin sa balay. Wala sila nangabuntis ug laagan, hilig og night life. Okay ra unta nga dili makaanak pero kanang night life dili ko ganahan kay bisan kinsa lang ang ilang mga kuyog. Masuko kon pugngan so I let them go. Basin tingali tungod kay naa sila sa late 20s ganahan pa og lingawlingaw. Wala na tingali sila kaagwanta sa akong strict nga handling nila. Mao na ang akong assessment sa akong past relationships.
Karon naa koy nailaila biyuda, 36 years old. Naa siyay usa ka anak sa iyang second husband. Yes kaduha na siya naminyo ug kaduha na nabiyuda. Mao na ang akong problema kay ang akong pamilya dili ganahan niya kay buayahon kuno. But kay nakaanak man siya, makahatag ni siyag anak nako. Unya akong nabantayan home body siya.
Ang problema lang gyud nako niya kanang giingon sa akong family nga siya buayahon. Tinuod ba gud na, Noy Kulas?
DOWNEY
Downey,
Nakadungog na ko anang buayahon. Naa gani uban ana magpa-palm reading aron pagdeterminar kon buayahon ba ang usa ka tawo. But sa pangutana kon motuo ba ko og buayahon, dili ko motuo.Nangamatay tong duha ka partners niya kay time na nila nga mamatay. Didto lang sila kutob ug coincidence lang nga nahimo silang partner sa mao nga babaye.
Kon nakagusto ka niya, sultihi siya sa imong gibati. Wala may babag nga legal ug bisan gani sa church kay biyuda na man siya. Ang kamatayon sa iyang mga bana nagwagtang sa iyang duha ka nangaging kaminyuon. Sa legal, gikinahanglan lang nga maghuwat og usa ka tuig sukad sa kamatayon sa bana ang babayeng minyo nga mabiyuda una pa makaminyo og lain.
Ganahan ka man kaha niya kay possible nga makahatag siya nimo og anak ug home body, so go for it. Ayaw og tuo anang buayahon. Isalig ang tanan sa Diyos kay siya ang Labaw nga Makagahahum sa tanan.
NOY KULAS
rojval69@yahoo.com