Dear Noy Kulas,
Itago lang ko sa alyas nga Ada, 46 years old, minyo. Ang akong bana sa abroad nagtrabaho ug magbakasyunan lang dinhi. Bag-o lang siya niuli ug nibalik ra sab dayon kay gipangita na siya sa kompaniya. Sa iyang pag-uli nagbilin siya og problema, iyang gibuntisan ang among helper.
Kining among helper dugay na namo. Minor pa ni diri na namo ni. Among gipaeskwela, pinangga kaayo namo ug sinaligan sa mga buhat sa balay. Mao na nisalig ra sab kaayo ko nga kada uli sa akong bana ikuyog siya if mamalit. Apan dinhi ko nasayop kay tungod ani nagkarelasyon sila. Nitug-an man ang among helper. Pagahatagan siya og dugang monthly allowance nga iyang gipadala sa iyang parents. Mao to nahaylo siya ug karon mabdos og upat ka buwan.
Naglibog ko unsay akong buhaton karon. Ang akong bana dili na gyud ma-contact bisan unsaon. Ang kompaniya wa sab nihatag og access nako kay personal decision sa akong bana kon motubag ba o di. Naa bay tulubagon ang akong bana sa pagmabdos aning bayhana? Mahimo bang ako siyang papaulion sa ilang lugar aron adto manganak? Please tambagi ko.
ADA
Ads,
Nakadayeg ko nimo kay sa tanan ang imong pangutana wala maglakip sa kasuko sa nahitabo. Lig-on ka. Tungod sab tingali sa imong level of maturity. Ang imong bana dunay tulubagon anang bayhana, dili ikaw. Apan kay naglikay na man kaha siya, wala na nitubag sa imong mga tawag, isip maayong Kristiyano, ikaw lang una ang sapupo sa responsibilidad sa imong bana. Ayaw lang na papaulia kay mosugot ka o dili, mas maeskandalo na hinuon mo kay masuko ang iyang pamilya kon makahibalo. Gi-assume nako nga dili na minor ang mao nga babaye, naa na sa legal age so ang kiha layo ra.
Kon duna moy mga anak ug mangutana, pasabta sila sa hitabo. Masuko na sila, apan molabay ra na. Lagmit madawat ra nila nga duna silay igsuon gikan sa laing inahan. Pasabta nga dili sala sa bata ang hitabo.
Magpadad-anan man kaha ang imong bana, part ana imong igahin sa pag-atiman sa iyang pagmabdos, pagpanganak ug pag-atiman sa bata. Human sa pagpanganak, mahimo na nimo silang papaulion, apan pahibaw-a daan ang pamilya sa iyang kahimtang karon. Expect everything nga bati ang reaction. Be strong and ubani sab sa pag-ampo nga malabang nimo ang labing dako nga krisis karon.
NOY KULAS
rojval69@yahoo.com