Dear Noy Kulas,
Tawga lang ko og Wilma, 41 years old. Minyo ko ug duna mi tulo ka mga anak sa akong bana. Ang akong bana nag work sa usa ka factory sa Mandaue City. Kaniadto wa mi problema kay balay ug work ra siya. Naa pay mga time nga iya kong hapiton sa akong trabahoan kon sayo ug dungan ang among off. Ako ra siyang huwaton kay kuhaon ra ko niya.
Nagsugod ang akong problema dihang nakakauban siya og babaye sa trabahoan nga matod pa niya paryente niya kay pareho og apelyedo sa iyang mama. Pero taga Mindanao ning bayhana samtang ang kaliwat sa akong mother-in-law taga northern Cebu man. Layo ra gyud kaayo. Nisulti nako ang akong bana kay nakabantay ko nga usahay manawag niya. Mangumusta gaunsa siya. ‘Gaw’ pa ang ilang tawganay. Pero nakabantay ko nga sukad naa na ning bayhana, nagkausab na sab ang akong bana. Di na ko niya kuhaon kay pirme na lang siya mag overtime.
Diha ka usa ako siyang gipakalitan og adto sa trabahoan, wa siya. Dihang akong gitawgan, kuyog kuno sila nangaon sa iyang mga barkada apan nakadungog ko sa tingog sa babaye. Unsa kaha, Noy Kulas, naa kaha ni silay relasyon bisan tingali paryente sila? Di ko gustong magkaaway ug modako, unsa man ang akong buhaton? Maayo kaha nga ako silang panid-an? Daghang salamat sa imong pagtagad aning akong e-mail.
WILMA
Wil,
Mas maayo nga samtang sayo pa, imo na siyang prang-ka-han nga duna kay naobserbahan nga mga kausaban sa iyang mga lihok sukad naa na ang iyang paryente nga lisod na subayon kon kaliwat ba gyud. Ang tan-awon ang degree man sa consanguinity kun kadug-ulon sa dugo.
Kon ikaw ang kuhaon, panagsahi nga ikaw ang moadto niya. Ayaw pananghid or sulti sa oras sa imong paggawas aron di siya makabantay. Kon mausban pa tong wa siya nagpahibawo nga kuyog siya sa iyang mga barkada nga hayan pangtabon lang, kana angay na kang magduda ug ipakita mo nga nasuko ka na niya. If duna ka nay matigom nga mga ebidensya, ireklamo na sa ilang human resource department kay imo man nang katungod isip asawa. Ayaw pasagdahi ang hitabo. Samtang sayo pa barugi ang imong pagka asawa sa kalma nga paagi sa sinugdan. Apan if naa na kay kamatuoran, idangop sa HR. Kinsa bay di mahadlok nga ipatawag?
NOY KULAS
rojval69@yahoo.com