Dear Noy Kulas,
I-hide lang ko sa alyas nga Jundy, 43, minyo na.
Ang akong problema parte ni sa akong relationship sa akong sister-in-law. Sa among ten years sa akong misis, nine years sab mi niya. Wala pa mi makasal sa akong asawa, duna na mi relasyon sa akong bayaw. Dili panghambog, siya ang gusto kaayo sa among relasyon nga nagsugod lang sa joke sa among chat. Nahibulong sab ko nga ganahan siya nako nga unta manghod man nako siya og mga 10 years.
Karon nga nakaanak na mi og usa sa akong asawa, gusto na kong mobiya niya pero supak kaayo siya. Nanghulga siya nga maghikog if buwagan nako siya og dayon. Wala na gani kuno siya mangita og lain, unya buwagan na hinuon kuno nako siya. Dream gani niya nga makaanak mi.
Noy Kulas, unsa kahay akoang buhaton aron maputol na ang among relasyon? Maayo kaha nga akoang tug-anan ang akong asawa? Dili kaha magubot og maayo ang pamilya ug ako ang mahimong dautan? Please tambagi ko. Ready ko modawat bisan unsay imong isulti diri nako.
JUNDY
Jundy,
Dako na nga problema apan gikinahanglan nga imong atubangon ang consequences nianang imong gibuhat sulod na sa usa ka dekada. Dili kay siya ra ang mabasol nianang inyong relasyon, apil ka na sab.
It takes two to tango sa ginaingon pa. So, kamong duha pulos mo nakasala sa imong asawa.
Magubot man gyud na kay kinsa may malipay nianang inyong gibuhat? Masuko na ang imong asawa ug pamilya diha nimo. Tingali ang imong pamilya maka-tolerate nimo apan ang sa imong asawa, labina sa parents, moulbo gyud na. Apan kinahanglan nga imo ning atubangon kay mao ra na nga paagi nga matul-id ang sayop nga gihimo ninyo. Kay wala ra bay aso nga makumkom.
Gawas tingali kon mo-abroad mo sa imong asawa ug anak aron makasugod mo og bag-ong kinabuhi didto. Kanang mangita ka og paagi nga maka-migrate mo sama sa ubang mga magtiayon. Hayan pinaagi niini makalikay ka niya nga way kagubot nga sangkuan. Apan if dili nimo makaya pa og abroad, atubanga karon ang problema.
NOY KULAS
rojval69@yahoo.com