Dear Noy Kulas,
Daghan na ko og naagian sa akong kinabuhi. Dagkong mga problema akong nalabang pero kaning latest lisod na man kaayo.
Tawga lang ko og Jane, 39 years old, minyo. Kining akong bana bisan sa uyab pa mi daan na ning palekero. Gatuo kong mausab ra ni siya kon maminyo na mi. Pero mao ra gihapon way kausaban, babaero lang gihapon pero mao ra sab na iyang bisyo, way lain.
Pero ang dili nako karon madawat kay kining iyang kabit karon mao ang akong first degree cousin. Ang grabe pa kay buntis ang akong ig-agaw. Wala na ko kaagwanta, akong gisulong sa ilang balay ug nagbugno mi kay bitin kaayo siya.
Nagkaaway mi karon sa iyang pamilya kay nilaban man niya. Ang akong bana wala na sab niuli sa amoa pila na ka adlaw karon.
Wala na sab ko mangita kon asa na kay naa pa ko sa grabeng kalagot. Napuno na ko sa iyang pagbinuang. Pwedi ba ko maka-file og annulment, Noy Kulas? Tambagi intawon ko.
JANE
Jane,
Mas maayong modangop ka og abogado parte nianang pagka-serial babaero niya kay dili ra ba na mahimong ground sa annulment, but mamahimo nang usa sa mga sukdanan sa psychological incapacity or fraud. Busa sa ako nang giingon nga dangop og abogado.
Dili man gani, adto ka sa DSWD konsulta kay bisan dili na physical abuse, abuso gihapon na nga emotional ug psychological.
Mahimo sab nimo silang ikiha kay naa man kay ebidensya against nila nga mao ang pagmabdos. But if naa moy mga anak, just think it og maayo kay maapektuhan baya sab ang mga bata. Balancing act gyud nang imoha karon.
Ayaw na to pangitaa ang imong bana kay basin nahadlok to sa imong pamilya kay ig-agaw baya nimo ang iyang gitukob, nimabdos pa gyud. Pasagdahi siyang mouli.
Makaya man sab kaha nimo pagbuhi ang imong pamilya bisan wa siya? Or ingnon nimo siya nga ang importante mao ang iyang financial support no matter unsay padulngan sa inyong relasyon karon.
NOY KULAS
rojval69@yahoo.com