Dear Noy Kulas,
Itago lang ko sa alyas nga Edwin, 46, taga Mandaue City. Ulitawo pa ko kay di ko ganahan magminyo kay hadlok ko nga makatumong og babaye nga di unya nako ikasinabot ug magkabuwag ra gihapon mi. Three times na ko nga nakaagi og live-in pero kining third mao ang labing dugay. Mga seven years na mi nga nagkauban pero wa mi nakaanak. Naa ni siyay manghod nga early 30s, dalaga nga abilidaran sa mga lalaki kay ilis-ilis lang og uyab kay gamay lang nga bikil, buwag dayon. Maayo ni siya og work ug dunay maayong position sa usa ka private company.
Kay lagi usahay maanha siya sa among balay, di kalikayan ma-attract ko kay gawas nga gwapa, sexy kaayo ni siya. Slim ug taas og buhok. Way lalaki nga di ma-attract. Usahay sa balay siya mopahulay ug okay ra sa akong partner. Naay time nauli ko og kaadlawon kay ang akong partner dunay company trip. Ang iyang sister maoy nangabli sa gate ug pultahan. Ambot ngano to, ako man gikupogan unya mibawos man sab. Naay nahitabo namo. Balik-balik gyud, pahuway lang og kadiyot. Kay two days nga wa akong partner, among gipahimudsan ang panahon, wa mi ning-work, same og magtiayon nga bag-ong gikasal. Kapoya ra ba kay batan-on pa siya while ako edaran na.
Karon akong problema, two months na siyang wa tungahi ug nagduda siyang mabdos. Nanghagad siya nga tabanon nako siya kay sa tanan kunong lalaki, naa nako ang tanan nga iyang gipangita. I love her, too. Unsa kahay akong buhaton? If mabdos gyud siya, ako ba siyang pakaslan?
EDWIN
Edwin,
Dako kaayo nang eskandalo kay imong gilumpong ang magsuon unya ang manghod, if tinuod nga mabdos, samot na. Samtang sayo pa, pag-istorya mo sa manghod ug ipaseguro mabdos ba siya. Ikaduha, sure ka nga ikaw ang amahan kay basin baya lain ang papa ug ikaw lang ang gipaangkon? Naay mga babaye nga ing-ana kon basehan nako ang past problems nga akong na-encounter. But at this time lisod pagsusi sa paternity ug maghuwat ka pa nga ipakatawo ang bata.
Yet atubanga ang problema. Estoryahi ang imong partner, tug-ani sa inyong sala. Ihilam-os ang tanan nga kasuko niya, but ayaw basli kay ikaw ang nakasala. Kon magpuyo mo sa manghod, puyo sa layo, ayaw sa duol aron malikayan ang dugang pang kagubot. Kon unsa man ang mosunod nga mga hitabo nga linugdangan sa inyong gibuhat, dawata ug atubanga kay imo man nang gisudlan. Timan-i, ang tanang problema moagi lang. If okay ra niya nga nagminyo mo ug segurado na ka nga ikaw ang papa, pakasli.
NOY KULAS
rojval69@yahoo.com