Dear Noy Kulas,
I-hide lang ko sa ngalan nga Karla, 33 years old. Kaslon na unta ko two years ago pero wa nadayon kay ang akong boyfriend naahat sa pagpakigminyo og laing babaye kay namabdos.
Human sa ilang kasal, gidala dayon siya sa babaye sa abroad kay ang pamilya niini toa na nagpuyo. Nagka-meet sila sa babaye dinhi sa Cebu kay nibakasyon ra unta. Paspas kuno kaayo ang mga hitabo ug iya na lang nahibaw-an mabdos ang babaye ug nibalik dinhi sa Pilipinas aron dinhi sila kaslon.
Tungod kay broken-hearted ko ug lisod kaayo ang trust issue nako ngadto sa mga lalaki, wa ko nag-boyfriend human niya. Recently lang nangumusta ang iyang younger brother nga mas older gihapon nako. Akong gisultihan nga naka-move on na ko pero wa gihapon nako pulihi ang iyang kuya.
Nagsugod mi og text, chat, video call and if magkaabot ang among day off, magkita. Didto nako nahibaw-an nga nakaduha na og anak ang iyang kuya sa asawa niini. Ang manghod buotan, pero dunay sense of humor ug witty manulti. Bisan buotan known siya nga playboy, pero mokatawa ra siya kon mag-ask ko. Naa silay gamay nga similarity sa iyang kuya.
Ga-ask siya nako lately kon open ra ba ko if mag-court siya nako kay naka-like kuno siya. Ako siyang gisultihan nga ako unang huna-hunaon kay di ba lain, from brod to brod? Di ba sama ra og gipasa-pasa ko?
KARLA
Karl,
Wa ko nakakita nga modako ang imong problema nga ang lalaki nga mo-court nimo younger brother sa imong ex. Mas nabalaka ko sa imong giingon nga known nga playboy. Kon naisahan ka sa maguwang, di na maayo nga maigo sab ka sa manghod. So, background check una og maayo, especially sa iyang exes ug kadtong mga tawo nga nakaila niya. Susiha una og maayo.
Kon ang resulta sa imong background check di maayo, ayaw pagsulod og relasyon. Kon nakaatik siya og daghang mga babaye, posibleng iya sab ning buhaton diha nimo. Basin pahigugmaon lang ka, apan biyaan ka in the end. Naa pa say daghang mga lalaki nga hayan mas worth pa sa imong time. Ayaw i-limit ang imong kalibotan diha niya. Naka-move on ka na man kaha? Okay ra man mo magkarelasyon, apan seguradoha nga di ka lang mabiyaan gihapon.
NOY KULAS
