Tambagi ko Noy Kulas: Mamun-og sa anak

Tambagi ko Noy Kulas
Tambagi ko Noy Kulas(SunStar File Photo)

Dear Noy Kulas,

Naa mi silingan nga disabled kay usa ni siya ka buta. Siya nagtrabaho isip masahista. Naa siyay anak nga usa sad ka disable kay ha’p man ang iya panan aw. Kining bataa kaedad ra sad sa akong anak mao permi ni bataa sa amoa. Amo ra sad atimanon kay ang gibinlan sa inahan igsuon sa iyang kapuyo ug wala lang sad nagpakabana sa bata.

Karon kay everytime moabot ang mama nga wala diha sa ilang balay ang bata, iyang bun-ugon man pag-ayo, imbis malipay siya nga naa ra sa amoa ang bata. Total giatiman man kaysa naa ra sa ilaha nga wla ra sad nagpakabana ang ilang gibinlan.

Kabadlungon na kaayo ko, Noy, kay naluoy ko sa bata. Naa gud ka usa naapil pa og bunal ang akong anak kay niduol siya kay naluoy sa iyang amigo.

Pwede ba siya i-report, Noy, nga usa man sad siya ka disabled? Para nako nasobraan ra sad siya kay di lang kausa ra ni niya buhata, naa pay ka usa gipaluhod niya ang bata gikan sa amoa paingon sa ilaha.

Palihog tambagi ko, Noy.

DAKMAT

Dakmat,

Wa bisan kinsa nga tawo nga dunay katungod nga mangulata, labina bata, bisan ginikanan pa. Klaro kaayo na ang balaod. Bisan sa pagka disabled di sab na lisensya nga makapangulata sa anak. Naay balaod nato nga nanalipod sa kabataan ug kababayen-an gikan sa pangabuso ni bisan kinsa, apil na mga ginikanan. Bisan siya disabled pud, covered gihapon siya sa atoang balaod.

Ayaw lang sa isumbong. Kon dunay kabanay nga imong masangpit, maduol ug maestoryahan kabahin sa kalapasan nga iyang nabuhat aron siya mabadlong. Kon di gani siya mopatuo, isumbong sa barangay ug seguroa kanang naa kay video o pictures as evidence. Ayaw kahadlok tungod kay nanalipod ka ra man sa bata kay nasubay man sa balaod. Supak sa balaod ang iyang gihimo busa angay nga santaon aron maundang. Basin wa sab na siya kahibawo ba nga mahimo siyang mapriso sa iyang gibuhat.

Usahay bitaw malab-anan ra tang mga ginikanan sa emosyon, madapatan ang anak but huna-hunaon usab unta nato ang resulta niini, di lang physical, kon di mental ug emotional nga epekto. Di ra ba gyud maayo sa bata kon nalab-anan na sa pisikal nga pagpanapat. Di na pagdisiplina, abuso na kaayo na.

NOY KULAS

rojval69@yahoo.com

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph