Dear Noy Kulas,
Sa atong kinabuhi naa gyuy mga hitabo nga dili mo lang paabuton nga moabot. Grabe pa kaayo. Mao ni ang akong na-experience karon. Tawga lang ko og Emma.
Minyo ug kining akong bana sukad pa kaniadto nga uyab mi mo-sideline gyud. Nagtuo kong nausab na siya human mi naminyo. But naay panagsa nga ako siyang nasakpan nga naay ka-chat. Dali ra nako siyang masakpan kay maratol dayon. Ilhanan nga dunay gitaguan.
Ang latest dili nako madawat kay ang iyang gikabit ang akong bestfriend ug classmate sa college. Nahugno ang akong kalibutan human nako nabasa ang ilang convo nga naghisgot sa ilang linapaay sa kama. Ang nakasakit kay mabdos ang akong classmate nga buwag sa bana. Unya ang akong bana ang amahan sa iyang gibuntis. Samtang kami wa pa mi anak bisan 12 years na ming minyo. Dihang ako siyang gi-confront, niingon siya nga natintal lang siya kay sige sila og chat hangtod nga niabot sa relasyon.
Ang akong classmate wa na nitubag sa akong mga tawag ug chat. Nipauli sa Mindanao human nako sila bahari nga akong ikiha ug ipapriso. Noy Kulas, unsa may akong buhaton? Makiha ba nako sila? Please tambagi ko.
EMMA
Em,
Kon mao ra nay imong nahunahunaan nga paagi nga makapahungaw ka sa imong kasuko, ikiha silang duha. Imo man nga magamit nga ebidensya ang ilang chat if imo tong na-keep o nakuhaan og screenshot. Dawaton na man na nga ebidensya ang digital nga materyal karon sa korte. Wa may laing paagi nga makapahungaw ka sa imong kasuko ngadto sa imong bana ug imong amiga, kana ra man tingali. Bug-at na nga ebidensya ang pagmabdos kay naghisgot man sila sa chat.
Anyway wa man sab moy anak nga angay kang magduhaduha kay basin masakitan og apil. Mas easier ang imong pagbuhat ini. Wa man sab kaha ka magsalig sa imong bana? Ang kana nga kiha usually strictly confidential sab ang pag-handle niana sa authorities labina babaye ang reklamante. Dili ka mabalaka nga mo-leak ug maprotektahan ang imong ngalan ug pamilya. Maayo ra sab ni kay aron motagam ang imong bana. Imo man gud nga gi-tolerate dihang uyab pa mo kay imo gud siyang gipakaslan. Kadto nga mga hitabo red flag na to. Sa dili ka pa mokiha, pangutan-a ang imong kaugalingon kon andam ka na ba sa kahasol sa mga husay sa korte.
NOY KULAS
rojval69@yahoo.com