Dear Noy Kulas,
Magpatambag ko nimo parte ning akong asawa. Itago lang ko sa ngalan nga Miong, 46-anyos.
Naa na mi duha ka mga anak sa akong asawa. Kaniadto sa medyo batan-on pa mi, hot kaayo ming duha nga maihap lang ang mga adlaw nga mingaw ang among kwarto. Sagad naa gyud nang mga hagawhaw aron dili madunggan. Kon unsa mi kainit kaniadto, grabe mi kabugnaw karon, sama sa baligyang ice sa among silingan. Nakabantay ko sa akong asawa nga medyo lud-on na man siya magbuhat mi sa gubat sa magtiayon. Daghan na kaayo siya og mga rason. Kanang kapoy na gikan sa work, wala siya sa mood ug bisan unsa na lang. Usahay dili na lang gud ko matulog sa kwarto ug tuyuon nako nga di ko mouli og sayo. Dili ra man sab siya mangita nako bisan mabuntagan ko.
Usahay magduda ko basin naa siyay lain. Unsa gyud kaha ang rason nganong ing-ani na siya? Usahay makahunahuna ko pagpangita og batan-on. Please tambagi ko.
MIONG
Miong,
Naay mga rason nganong naay mga babaye mausab ang ilang gana anang butanga. Usa ana kanang physiological nga kausaban. Naay ubang mga babaye nga sayo mag menopausal. Kana makaapekto kaayo na sa ilang gana kay mag hormonal nga kausaban baya ug affected ang ilang gana. So, ayaw lang dayon pagduda nga naa na siyay lain.
Hinuon maayo sab nga magsusi ka nga sekreto. Imo ba ron kaliton og kuha sa trabahoan o kon dili man gani ihatod og kalit. Obserbahi lang ang reaction. Makilig or malipay, kana way trampas. Masuko gani, nagkinahanglan na gyud na og further verification kay dili siya angay masuko, angay gani unta malipay kay nagpakita ka og pagtagad niya. Sign na sa care bisan tuod ang imong tumong mao ang pagpaniid.
Ayaw lang sab pangabit. Ayaw sab pag-uli og dugay or usbon nimo ang imong oras sa pag-uli ug pag-stay sa balay kay kanang butanga nga imong gireklamo dili man na maoy whole definition lang sa kaminyuon. Ayaw lang gyud siya lung-i sa pagpamarayeg.
NOY KULAS
rojval69@yahoo.com